ފޮރިން މިނިސްޓްރީން ބުނީ އިރުތިޝާމް ޗައިނާއަށް ވަޑައިގަތީ ދެ ދުވަހުގެ ދަތުރުފުޅެއްގައި ކަމަށެވެ. އެ ދަތުރުފުޅުގައި އޭނާ، ޔުނާން ޕްރޮވިންސުގައި އޮންނަ ޗައިނާ-ސައުތު އޭޝިއާ ކޯޕަރޭޝަން ފޯރަމްގައި ބައިވެރިވެވަޑައިގަންނަވާނެ ކަމަށް އެ މިނިސްޓްރީން ބުންޏެވެ.
އެ ފޯރަމްގައި އިރުތިޝާމް ކީނޯޓް ތަގުރީރެއް ދެއްވާނެ ކަމަށާއި، އޭނާ 10ވަނަ ޗައިނާ-ސައުތު އޭޝިއާ އެކްސްޕޯގައި ވެސް ބައިވެރިވެވަޑައިގަންނަވާނެ ކަމަށް މިނިސްޓްރީން ބުންޏެވެ. އަދި އެ ދަތުރުފުޅުގައި އޭނާ ޔުނާން ޕްރޮވިންސްގެ ސަރުކާރުގެ އިސް އޮފިޝަލުންނާ ބައްދަލުކުރައްވައި، އެ ސަރަހައްދުގައި ދިރިއުޅޭ ދިވެހި ދަރިވަރުންނާ ބައްދަލުކުރައްވާނެ ކަމަށް ވެސް މިނިސްޓްރީން ބުންޏެވެ.
މިދަތުރުފުޅުގައި އިރުތިޝާމް އާދަމްގެ އަރިހުގައި އެވުޒާރާގެ އެޑިޝަނަލް ސެކްރެޓަރީ އަމީން ޖާވިދް ފައިސަލް އާއި ޑިރެކްޓާ މަރިޔަމް ބައްސާމާ ފާރޫގް ބައިވެރިވެވަޑައިގަންނަވަ އެވެ.
އިރުތިޝާމް ފޮރިން މިނިސްޓަރު ކަމަށް އައްޔަންކުރެއްވީ މިދިޔަ އޭޕްރިލް މަހުގެ 14 ވަނަ ދުވަހު ކަމަށްވާއިރު، އޭނާ އެ މަގާމުގައި ހުންނަވައިގެން ގައުމުން ބޭރަށް ކުރެއްވި ފުރަތަމަ ދަތުރުފުޅުގައި ވަޑައިގަތީ އިންޑިއާއަށެވެ.
