އެމެރިކާއާއި އީރާނާ ދެމެދު ހިނގަމުންދާ އަސްކަރީ ހަމަލާތައް ހުއްޓާލުމަށް ދެ ގައުމުން ސުލްހައިގެ އެއްބަސްވުމަކަށް އައިސްފައި ވަނީ މިއަދެވެ.
މި އެއްބަސްވުމުގެ ސަބަބުން މުޅި ސަރަޙައްދަށް ބޮޑެތި ބަދަލުތަކެއް އަންނާނެކަމަށް ބެލެވެއެވެ. ޕާކިސްތާނުގެ ބޮޑުވަޒީރު ޝެހްބާޒް ޝަރީފް ވިދާޅުވި ގޮތުގައި، މިއެއްބަސްވުމުގެ ދަށުން ލުބުނާންވެސް ހިމެނޭހެން ހުރިހާ ފްރަންޓެއްގައި ހިނގަމުންދާ އަސްކަރީ އޮޕަރޭޝަންތައް ހުއްޓާލެވޭނެ އެވެ.
މީގެ އިތުރުން އީރާނުގެ މީޑިއާތަކުން ރިޕޯޓުކުރާ ގޮތުގައި އެއްބަސްވުމުގެ ދަށުން އެމެރިކާއިން އީރާނަށް އަޅާފައިވާ ކަނޑުގެ ބްލޮކޭޑް 30 ދުވަސް ތެރޭގައި ނިމުމަކަށް އަންނާނެ އެވެ. އެއްބަސްވުމުގެ ފުރިހަމަ ތަފްސީލުތައް ކުރިއަށް އޮތް ދުވަސްތަކުގައި އިތުރަށް ހާމަވެގެންދާނެ ކަމަށް ބެލެވެ އެވެ.
ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ ހޮރުމުޒް ކަނޑުއޮޅިން މިނިވަންކަމާ އެކު ދަތުރުފަތުރުކުރެވޭނެކަން ކަށަވަރުކުރުން ހިމެނޭހެން އެމެރިކާއާއި އީރާނާ ދެމެދު ހުރި ދެބަސްވުންތައް ހައްލުކުރަން މެމޯރެންޑަމް އޮފް އަންޑަސްޓްޓޭންޑިން އެއް ގާއިމްކުރުމުން އެއްބަސްވެފައި ވާތީ ދިވެހިރާއްޖެއިން އެކަމަށް މަރުހަބާ ކިޔާ ކަމަށެވެ.
ހިޔާލުތަފާތުވުންތައް ހައްލުކުރުމާއި ދެފަރާތުން ކަންބޮޑުވާ މައްސަލަތައް ހައްލުކުރުމުގެ ވަސީލަތެއްގެ ގޮތުގައި މަޝްވަރާއާއި ޑިޕްލޮމެސީ ކުރިއަށް ނެރުނީތީ އެ ކަމަށް ދިވެހި ސަރުކާރުން އަގު ވަޒަންކުރާ ކަމަށް ވެސް ބަޔާނުގައިވެ އެވެ.
އަދި މި ސުލްހަ ގެނައުމަށް މެދުވެރިއެއްގެ ގޮތުގައި މަސައްކަތްކުރި ޕާކިސްތާނާއި ގަތަރުގެ އިތުރުން ގަލްފު ސަރަހައްދުގެ އެހެން ގައުމުތަކާއި ބައިނަލްއަގއުވާމީ ބައިވެރިން މި މަޝްވަރާއަށް މަގުފަހިކޮށްދިނުމަށް ކުރި މަސައްކަތްތަކަކީ ބިނާކުރަނިވި މަސައްކަތްތަކެއް ކަމަށް އެ ބަޔާނުގައިވެ އެވެ. އަދި އެއީ ތައުރީފު ހައްގު މަސައްކަތްތަކެއް ކަމަށް ވެސް ބުނެފައިވެ އެވެ.
