ނޮކައުޓް ބުރުގެ ފުރަތަމަ ބުރުގެ މެޗުގައި ރޭ ފްރާންސް ފުރަތަމަ ހާފު ނިންމާލީ ހާފުގެ ފަހު މިނިޓުގައި އުސްމާން ޑެމްބެލޭ ދިން ބޯޅައެއް ހިފައިގެން ކުރިއަށް ޖެހިލައި ކިލިއަން އެމްބާޕޭ ޖަހައިދިން ގޯލުންނެވެ.
ފްރާންސްގެ ދެވަނަ ލަނޑަކީ ދެ ވަނަ ހާފްފެށިގެން އަށްވަނަ މިނެޓުގައި އޮލީސޭ ތަނަވަސްކޮށްދިން ފުރުސަތަކުން ބްރެޑްލީ ބާކޯލާ ކާމިޔާބުކުރި ލަނޑެކެވެ. އާސެނަލްގެ ޝައުގުވެރިކަން ހުއްޓިފައިވާ ކަމަށް އަޑުފެތުރިފައިވާ ބާކޯލާ ވަނީ ގޯލުގެ މަތީ ކަނަށް ބޯޅަ ފޮނުވާލައިގެން ފްރާންސްގެ ލީޑު ފުޅާކޮށްދީފަ އެވެ.
މެޗުގެ 74 ވަނަ މިނެޓުގައި އެމްބާޕޭ ވަނީ އޭނާގެ ދެވަނަ ލަނޑު ކާމިޔާބުކޮށް ފްރާންސްގެ މޮޅު ކަށަވަރުކޮށްދީފަ އެވެ. އެމްބާޕޭ މި ވަނީ މި މުބާރާތުގައި މިހާތަނަށް ޖުމްލަ ހަ ލަނޑު ހަމަކޮށް އާޖެންޓީނާގެ ލިއޮނެލް މެސީއާ އެއްވަރު ކޮށްފަ އެވެ.
ފީފާ ވޯލްޑް ކަޕް ފުޓްބޯޅަ މުބާރާތުގެ ގަދަ 32 ޓީމުގެ ބުރުގައި ފްރާންސް އާއި ސްވިޑެން ކުޅުނު މެޗުގެ ތެރެއިން: އޮލީސޭ އޯވަހެޑް ކިކަކުން ބޯޅަ ފޮނުވާލަނީ.
ނިއު ޖާޒީގެ ގަދަ ހޫނުގައި ކުޅުނު މެޗުގެ އިތުރު ވަގުތުގައި ފްރާންސްގެ ފޯވާޑް، ޖިއަން ފިލީޕް މަޓޭޓާ އަށް އޭރިއާތެރެއިން ގޯލަށް ފޮނުވާލަން ލިިބުނު ބޯޅަ ދިޔައީ ހުރަސްދަނޑިމަތިންނެވެ.
މި މޮޅާއެކު ފްރާންސް ދެން ބައްދަލުކުރާނީ ޕެނަލްޓީ ޖަހައިގެން ޖަރުމަނު ބަލިކުރި ޕެރަގުއޭއާ އެވެ. މި މެޗު އޮންނާނީ އަންނަ ހޮނިހިރު ދުވަހު ފިލަޑެލްފިއާގަ އެވެ.
