މިނިސްޓަރު މިހެން ވިދާޅުވީ ހިޔާ ޓަވަރުތަކުގައި އިތުރު ލިފްޓު ހަރުކުރުމުގެ މަޝްރޫއު ނިންމައި އިފްތިތާހުކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މުއްތަލިބު ވިދާޅުވީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުމާލޭގައި ތިބި ރައްޔިތުންނަށް ހިދުމަތް ދިނުމަށް އެކަށީގެންވާ ބިންތަކެއް ނެތުމާއެކު، އެ ތަނުން ބޯހިޔާވެހިކަމަށް ނިމިދިޔަ ސަރުކާރުން ދޫކޮށްފައިވާ ބިންތައް ވިޔަފާރިކުރެވޭނެ ގޮތް ތަނަވަސް ކޮށްދޭން ޖެހޭ ކަމަށެވެ.
މިިނިސްޓަރު ވިދާޅުވީ އެޗްޑީސީގެ ބިންތަކުން އެކަނި ރައްޔިތުންނަށް ބޭނުންވާ ހިދުމަތްތަކާއި ވިޔަފާރިކުރެވޭނެ ގޮތްތައް ހަމަޖެހެން ނެތް ކަމަށެވެ. އެހެންކަމުން ހުޅުމާލޭގެ ފޭސް ދޭކުންނާއި ފޭސް ތިނަކުން މާލޭ މީހުންނަށް ދޫކޮށްފައިވާ 2،000އަށް ވުރެ ގިނަ ގޯތިން ވެސް އެ ކަމަށް ބިން ހަމަޖެހެން ޖެހޭ ކަމަށް މުއްތޮލިބު ވިދާޅުވި އެވެ.
އޭގެ އިތުރުން ހުޅުމާލޭގެ އެ ފޭސްގައި ވެސް އިތުރު ވިޔަފާރީގެ ހަރަކާތްތައް އުފެދި، ވަޒީފާގެ ފުރުސަތުތަކާއި ރައްޔިތުން ބޭނުންވާ އިތުރު ހިދުމަތްތައް ވެސް ގާއިމުކުރެވިގެން ގޮސް އެ ސަރަހައްދުގެ އިގުތިސޯދު ފުޅާވެގެންދާނެ ކަމަށް މުއްތޮލިބު ވިދާޅުވި އެވެ.
ކުރީގެ ސަރުކާރުން ބިންވެރިޔާގެ ސްކީމްގެ ދަށުން ހުޅުމާލޭ ފޭސް 2 އާއި 3 އަދި ގުޅީފަޅާއި ގިރާވަރު ފަޅުން މާލޭ ރައްޔިތުންނަށް ގޯތި ދޫކޮށްފައިވަނީ ހަމައެކަނި ދިރިއުޅުމުގެ ބޭނުމަށެވެ. އަދި ވިޔަފާރި އުސޫލުން އެ ބިންތައް ބޭނުން ނުކުރެވޭނެ ކަމަށް ޝަރުތުކޮށްފައި ވެސް އޮތެވެ.
