އަރަބިއްޔާ ސްކޫލް އަޅަން ބިން ހަވާލުކުރިތާ ގާތްގަނޑަކަށް ތިން އަހަރުވެފައިވާއިރު، އެ މަސައްކަތް އޮތް ހިސާބެއް ސާފުކޮށްދޭން މިއަދު ރައްޔިތުންގެ މަޖިލީހުގައި މެމްބަރަކު ކުރި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ އަރަބިއްޔާ ސްކޫލުގެ އާ އިމާރާތުގެ މަސައްކަތް އަންނަ ނޮވެމްބަރަށް ނިމޭނެކަމަށެވެ. އަދި އަންނަ އަހަރު އެ ސްކޫލުގެ އާ އިމާރާތުގައި ކިޔަވައިދޭން ފެށޭނެކަމަށްވެސް މިނިސްޓަރު ވިދާޅުވިއެވެ.
އެމްޑީޕީގެ ދެ ސަރުކާރު ކަމަށްވާ ކުރީގެ ރައީސް މުހައްމަދު ނަޝީދާއި އިބްރާހިމް މުހައްމަދު ސާލިހުގެ ސަރުކާރުގައި ވެސް އަރަބިއްޔާ ސްކޫލަށް ވަރަށް ބޮޑަށް އިހުމާލުވެފައިވާ ކަމަށް ޝަފީއު ވިދާޅުވިއެވެ. އެގޮތުން އެ ސްކޫލްގެ ދަރިވަރުން ގެންގުޅުނީ ރެފިއުޖީންގެ ގޮތުގައިކަމަށް މިނިސްޓަރު ޝަފީއު ވިދާޅުވިއެވެ.
އަރަބިއްޔާގެ އާ އިމާރާތަކީ ނިމިދިޔަ ރައީސް އިބްރާހިމް މުހައްމަދު ސާލިހްގެ ސަރުކާރުގެ ވެސް ވައުދެކެވެ. އެހެންނަމަވެސް ދައުރު ނިމުނުއިރު ވެސް މަސައްކަތެއް ނުފެށެއެވެ.
