ހުޅުމާލެ ފޭސް ދޭއްގައި ހުންނަ ކާމިލް ދީދީ ސްކޫލުގައި ހުރި ވޯޓް މަރުކަޒުގައި ވޯޓު ގުނަމުން ދަނިކޮށް ހިނގި މި ހަމަނުޖެހުމާ ގުޅިގެން، ހައްޔަރުކޮށްފައިވަނީ 23 އަހަރާއި 24 އަހަރުގެ ދިވެހި ދެ ފިރިހެނެއްކަމަށް ފުލުހުން ބުނެއެވެ. މި ދެ ޒުވާނުން ހައްޔަރުކުރީ ކޯޓް އަމުރެއްގެ ދަށުންކަމަށް ފުލުހުން ބުނެއެވެ.
މިދިޔަ ހޮނިހިރު ދުވަހުގެ ރޭގައި ޕީއެންސީގެ ކެންޑިޑޭޓުންގެ މަންދޫބުންގެ މެދުގައި ދެބަސްވެ، ހިނގި ހަމަނުޖެހުމުގެ ވީޑިއޯ ސޯޝަލް މީޑިއާގައި ވަނީ އާއްމުވެފައެވެ. އެ ވީޑިއޯއިން އެކަކު އަނެކަކާ ދިމާއަށް، އެ ތަނުގައި ހުރި ގޮނޑިތައް އުކާ މަންޒަރާއި، އިންޒާރުދޭ އަޑު އިވެއެވެ.
އެ ވަގުތު އެތަނުގައި ތިބި ފުލުހުން މަސްލަހަތު ކޮންޓްރޯލް ކުރަން މަސައްކަތް ކުރި ނަމަވެސް، ހަމަނުޖެހުންތައް މައިތިރި ނުވެ ގިނަ އިރުތަކަކަށް ދެމިގެން ގޮސްފައިވެއެވެ.
