ކަނޑުއޮޅީގެ ކޮންޓްރޯލް ހޯދުމަށް ދެގައުމުން ދެމުންދާ ހަމަލާތަކާ ގުޅިގެން، ބައިނަލްއަގުވާމީ ބެންޗްމާކް ކަމަށްވާ ބްރެންޓް ކްރޫޑްގެ އަގު ހޯމަ ދުވަހު ވަނީ 4 އިންސައްތައަށް މަތިވެ، ފީފާއެއްގެ އަގު 79.11 ޑޮލަރަށް އެރިއިރު، އެމެރިކާގެ ވެސްޓް ޓެކްސަސް އިންޓަމީޑިއަޓްގެ އަގު %4.11 މަތިވެ ފީފާއެއްގެ އަގު 74.36 ޑޮލަރަށް ވަނީ އުފުލިފަ އެވެ.
އީރާނުން ބުނާ ގޮތުގައި އެ ކަނޑުއޮޅިން ދަތުރުކުރާ މަގުތައް ކޮންޓްރޯލްކުރުމުގެ ހައްގު އެގައުމަށް ލިބިގެންވެ އެވެ. އަދި އެ މަގު ބޭނުންކުރާ އުޅަނދުތަކުން ފީ ނެގުމަށް ރާވަމުންދާކަން ވެސް އެ ގައުމުން ވަނީ އިއުލާންކޮށްފަ އެވެ.
ނަމަވެސް އެމެރިކާއިން އެ ގޮތް ގަބޫލެއް ނުކުރެ އެވެ. އެމެރިކާ އިން ބުނަނީ ވިޔަފާރި އުޅަނދުތަކަށް އެ ކަނޑުއޮޅިން އެއްވެސް ހުރަހެއްނެތި މިނިވަންކަމާ އެކު ދަތުރުކުރެވެންޖެހޭނެ ކަމަށެވެ.
ހޮރްމުޒް ކަނޑުއޮޅިން ތެޔޮ އުފުލާ އުޅަނދެއް ދަތުރުކުރަނީ. - ފޮޓޯ: ރޮއިޓަރސް
މީގެ ދެ މަސް ކުރިން އެމެރިކާ އާއި އިޒްރޭލުން އީރާނަށް ދިން ހަމަލާތަކާ އެކު ފެށުނު މި ހަނގުރާމަ މެދުއިރުމަތީގެ އެކި ސަރަހައްދުތަކަށް ފެތުރި، ދުނިޔޭގެ އިގްތިސާދަށް ބޮޑު ލޮޅުމެއް އަރައި، އެތައް ސަތޭކަ މިލިއަން މީހުންނަށް ވަނީ އަސަރުކޮށްފަ އެވެ.
