މި ހަމަލާތައް އަމާޒުކޮށްފައިވަނީ ކުވައިތު، ގަތަރު، ބަހުރައިން، އުރުދުން، އުމާން އަދި ސޫރިޔާގައި ހުރި އެމެރިކާއިން ބޭނުންކުރާ އަސްކަރީ މަރުކަޒުތަކަށެވެ.
މި ގައުމުތަކުގެ އަސްކަރީ މަރުކަޒުތައް ބޭނުންކޮށް އެމެރިކާއިން އިއްޔެ ވަނީ އީރާންގެ ކުޑަކުދިންނަށް ފަރުވާދޭ ކެންސަރު ހޮސްޕިޓަލެއް ކައިރިއަށް ހަމަލާ ދީފަ އެވެ.
އީރާނުން ބުނީ އަވައްޓެރި ގައުމުތަކުގެ އިންފާރަށް ހަމަލާ ދޭން ޖެހޭތީ ދެރަވާ ކަމަށާއި ނަމަވެސް އެ ގައުމުތަކުގެ ބައިވެރިވުން އޮވެގެން އެމެރިކާއިން އީރާނަށް ދޭ ހަމަލާތަކުގެ ބަދަލުހިފުމަކީ ގައުމީ ވާޖިބެއް ކަމަށެވެ. އެގޮތުން އެމެރިކާގެ އަސްކަރީ މަރުކަޒުތައް ހުރި ގަލްފުގެ ގައުމުތަކަށް އަމާޒުކޮށް ހަމަލާދިނުން އިތުރަށް ވަރުގަދަ ކުރުމުގެ ޕްލޭނަށް އިރާނުން އަމަލުކުރުމަކީ ރައްޔިތުންގެ ހައްގުގައި ނިންމާ ނިންމުމެއް ކަމަށެވެ.
އެމެރިކާއާއި އިސްރާއީލު ގުޅިގެން އީރާނަށް ދެމުންދާ ހަމަލާތަކުގައި މިހާތަނަށް 38 މީހުން ޝަހީދުވެ، 400 އަށްވުރެ ގިނަ މީހުން ވަނީ ޒަހަމްކޮށްލާފަ އެވެ. މި އުދުވާނުގައި އެމެރިކާގެ ހަމަލާތައް ބޮޑަށް އަމާޒުވަމުންދަނީ އީރާނުގެ ހުރުމުޒްގާން ޕްރޮވިންސަށެވެ.
މިއީ އެ ގައުމުގެ ދެކުނުގައި އޮންނަ ހުރުމުޒް ކަނޑުއޮޅިއާ ގުޅިފައިވާ އައްސޭރިފަށުގެ ޕްރޮވިންސެކެވެ. މި ޕްރޮވިންސްގެ ވެރިރަށަކީ ބަންދަރު އައްބާސް އެވެ. މިއީ ތެޔޮ އުފުލުމުގެ އިތުރުން، އީރާނުގެ ބޮޑެތި މަޝްރޫއުތަކެއް ހިންގާ ސަރަހައްދެކެވެ.
އީރާނުގެ ދައުލަތުގެ މީޑިއާ، އައިއާރްއައިބީއާ ހަވާލާދީ ރިޕޯޓުކޮށްފައިވާ ގޮތުގައި، އީރާނުގެ އެންމެ އިސް ރޫހީ ލީޑަރުގެ އަސްކަރީ މުޝީރު ރިޒާއީ ވިދާޅުވީ، އެމެރިކާގެ ހަމަލާތައް މެދުނުކެނޑި ކުރިއަށްދާނަމަ، އީރާނުގެ އަސްކަރީ ސްޓްރެޓެޖީ ބަދަލުކުރާނެ ކަމަށެވެ.
ހަމައެކަނި ރައްދުދިނުމުގެ ގޮތުން ދޭ ހަމަލާތަކަކުން އީރާނު ދެން ނުހިފެހެއްޓޭނެ ކަމަށާއި، ސިޔާސީ އެއްވެސް ސަރަހައްދީ ރޮނގަކަށް ރައްކާތެރިކަމެއް ނޯންނާނެ ކަމަށް އޭނާ އިންޒާރުދެއްވި އެވެ.
ދާދި ފަހުން ދެވުނު މި ހަމަލާތަކަކީ ސުލްހައިގެ މަޝްވަރާތައް ހުއްޓުމަކަށް އައި ފަހުން، އެމެރިކާއިން ކޮންމެ ރެއަކު ހިންގާ އަސްކަރީ އޮޕަރޭޝަންތަކަށް އެއް ހަފުތާ ފުރުނު ދުވަހެވެ. މި ނުތަނަވަސްކަމުގެ ސަބަބުން ހުރްމުޒް ކަނޑުއޮޅި ސަރަހައްދުގެ އަމަންއަމާންކަން ވަނީ ވަރަށް ބޮޑަށް ގޯސްވެ، ބައިނަލްއަޤުވާމީ ފެންވަރުގައި ކަންބޮޑުވުން އިތުރުވެފަ އެވެ.
