ބޭރުމަގު ޒަމާނީ ފެންވަރަށް ތަރައްގީކުރުމުގެ މަސައްކަތުގައި ދަށުން ހެންވޭރު ފެރީ ޓާމިނަލުން ފެށިގެން އިއްޒުއްދީން ފާލަމާ ހަމައަށް އޮތް ސަރަހައްދު ތާރު އަޅައިގެން ހެދުމަށް ފަހު މިއަދު ހަވީރު ވަނީ އާއްމުކޮށް ހުޅުވާލާފައެވެ.
އެ ސަރަހައްދު އަލުން ހަދާ ނިންމިއިރު ބީއެމްއެލްގެ ހެޑް އޮފީސްް ކުރިމަތީ ފަޅު ތެރެއިން ބޮޑު ބައެއް ހިއްކާ ޕާކިން ޒޯނެއް ވަނީ ހަދާފައެވެ. އެ ޕާކިން ޒޯނަކީ 500 ސައިކަލުގެ ޖާގައިގެ ޕާކިން ޒޯނެއްކަމަށް އިންފްރާސްޓްރަކްޗާ މިނިސްޓްރީން ވަނީ ބުނެފައެވެ.
މިމަގު އަލުން ހަދާ ހުޅުވާލުމުން ފުލުހުން ބުނީ މާލެ ވަށައިގެންވާ ބޮޑުތަކުރުފާނުމަގު އެއްކޮށް މިހާރު ހުޅުވާލާފައި ވާއިރު، އެ މަގުގައި ޕާކްކުރުމަށް ހާއްސަކޮށް ކަނޑައަޅާފައިވާ ޕާކިން ޒޯންތައް ފިޔަވައި އެހެން ތަންތަނުގައި އުޅަނދުތައް ޕާކް ނުކުރުމަށް އެންމެހައި ފަރާތްތަކަށް އިލްތިމާސްކުރާކަމަށެވެ. އަދަި އެމަގުގައި ޕާކު ކުރާނަމަ ފިޔަވަޅު އަޅާނެކަމުގެ އިންޒާރުވެސް ފުލުހުން ވަނީ ދީފައެވެ.
ބޭރުމަގުގައި އަލަށް ހެދި ޕާކިން ޒޯން
ބޭރުމަގުގައި އަލަށް ޕާކިން އޭރިޔާ ހަދާތީ އެ މަގު ތަރައްގީކޮށް ނިންމާ އެ މަގު ބޭނުންކުރަން ފެށުމުން މަގުގައި ޕާކު ނުކުރެވޭނެކަަމަށް ރައީސް ޑރ. މުހައްމަދު މުއިއްޒުވެސް ވަނީ ވިދާޅުވެފައެވެ.
ބޮޑުތަކުރުފާނު މަގު ފުޅާކޮށް، ތަރައްގީ ކުރުމުގެ މަސައްކަތް ފަށާފައިވަނީ މިދިޔަ އޯގަސްޓު މަހު އެވެ. އެމްޓީސީސީއާ އެ މަސައްކަތް ހަވާލުކޮށްފައި ވަނީ، 455 ދުވަހުން (ގާތްގަނޑަކަށް 1 އަހަރާއި 3 މަހުން) ނިންމަން ޖެހޭ ގޮތަށެވެ. މަސައްކަތުގެ އަގަކީ 144 މިލިއަން ރުފިޔާއެވެ.
