ފުރަތަމ ޓާމްގެ ކިޔެވުން ނިންމާލުމަށްފަހު ދަރިވަރުން ޗުއްޓީއަށް ދިޔައީ މިިިދިޔަމަހުގެ 16 ވަނަދުވަހުއެވެ.
މިއަހަރުގެ ދިރާސީ ކަލަންޑަރުގައިވާ ގޮތުން މިއަދު ފެށުނު ދެވަނަ ޓާމްގައި ކިޔަވާދޭނީ 75 ދުވަހުއެވެ. އަދި އަންނަ މަހުގެ 13 އިން 19 އަށް ހަތް ދުވަހުގެ މިޑް ބްރޭކެއް ދަރިވަރުންނަށް ލިބޭނެއެެވެ. އޭގެފަހުން ޑިސެމްބަރުމަހުގެ އެކަކުން 10 އަކަށް އިމްތިހާނުތައް ބޭއްވުމަށްފަހު ބޮޑު ބަންދަށް ސްކޫލްތައް ބަންދުވާނީ 18 ޑިސެމްބަރުގައެވެ. ދިރާސީ ކަލަންޑަރު ބުނާގޮތުން ބޮޑު ބަންދަށްފަހު އަންނަ އަހަރަށް ސްކޫލް ހުޅުވާނީ 2027 ވަނަ އަހަރުގެ ޖެނުއަރީ މަހުގެ 12 ވަނަ ދުވަހުއެވެ.
ދިރާސީ ކަލަންޑަރު
އެޑިއުކޭޝަން މިނިސްޓްރީހެ ހިސާބުތައް ދައްކާގޮތުން ޕްރީސްކޫލުން ފެށިގެން ގްރޭޑް 12 އާ ހަމައަށް، މި އަހަރު 80،715 ދަރިވަރުން ތައުލީމު ހާސިލް ކުރާނެއެވެ. މި ދަރިވަރުންނަށް ކިޔަވާ ދިނުމުގައި 9،952 ޓީޗަރުން ހަރަކާތްތެރިވާއިރު ސަރުކާރުގެ 218 ސްކޫލެއްގައި ކިޔަވާދޭނެއެވެ.
ދިރާސީ އަހަރަށް އަތޮޅުތަކުން މާލޭ ސްކޫލްތަަކުގައި ކިޔަވަން ބޭނުންވެގެން 1500 ދަރިވަރުން ބަދަލުވިކަމަށް އެޑިއުކޭޝަން މިނިސްޓްރީން ވަނީ ބުނެފައެވެ.
މާލޭގެ ސްކޫލުތަކުން ހުޅުމާލޭގެ ސްކޫލްތަކަށް 836 ދަރިވަރަކު ބަދަލުވާން ހުށަހަޅާފައިވެއެވެ. މާލޭގެ ސްކޫލުތަކުގެ ގްރޭޑް އެކަކަށް މި އަހަރު އަލަށް 1،748 ދަރިވަރުން ވައްދާފައިވެއެވެ. މީގެއިތުރުން މާލެއިން ހުޅުމާލެއަށް 836 ކުދިން ބަދަލުވެފައިވާ ކަމަށްވެސް އެޑިއުކޭޝަން މިނިސްޓްރީން ބުނެއެވެ.
