މ. ރަތްމަންދޫގައި ދިރިއުޅޭ މީހުން، ކ. ތުލުސްދޫއަށް ބަދަލުކުރަން ބޭނުންވާ 44 ގޯތި އަޅަން ބޭނުންވާ ބިން އެ ރަށުގެ ކައުންސިލުން ވަނީ ހަމަޖައްސާދީފަ އެވެ.
ރަތްމަންދޫ މީހުން ތުލުސްދޫއަށް ބަދަލުކުރުމުގެ މަސައްކަތް ގޮސްފައިވާ ހިސާބާއި ގުޅޭގޮތުން ދިއްގަރު ދާއިރާގެ މެމްބަރު އަހްމަދު ނާޒިމް މިއަދު މަޖީލީހުގައި ސުވާލުކުރައްވަމުން ވަނީ ރަތްމަންދޫ މީހުން ތުލުސްދޫއަށް ބަދަލުކޮށް ނިމެނޭ ތާރީހެއް ދެއްވުމަށް ހައުސިން މިނިސްޓަރު ޑރ. މުއްތަލިބް ކިބައިގެން އެދިވަޑައިގެންފަ އެވެ.
އެވާހަކަތަކަށް ޖަވާބު ދެއްވަމުން މިނިސްޓާރު މުއްތަލިބް ވިދާޅުވީ ރަތްމަންދޫ މީހުން ތުލުސްދޫއަށް ބަދަލުކުރުމަށް ބޭނުންވާ ބިން ހަމަޖެހި ނިމިފައި ވާކަމަށެވެ. އެހެންނަމަވެސް އެމީހުން ބަދަލުކުރަން އަޅާ އިމާރާތްތައް ނޭޅި ލަސްވަނީ އެތާ ކައިރީ އޮންނަ ރިސޯޓް ހިންގާ އެމްއޭސީއެލުން ރަތްމަންދޫ މީހުން ތުލުސްދޫއަށް ބަދަލުކޮށްދިނުމުގެ ހުރިހާކަމެއް ކުރުމަށް ހުށައަޅާފައިވާތީ އެ ކުންފުނީގެ ޕްރޮޕޯސަލް އަދި ލިބިފައިނުވާތީ ކަމަށެވެ.
މިނިސްޓާރު މުއްތަލިބް ވިދާޅުވީ ރަތްމަންދޫ މީހުން ތުލުސްދޫއަށް ބަދަލުކުރުމަށް ކުރަންޖެހޭ ހުރިހާކަމެއް އެމްއޭސީއެލުން ކޮށްދޭނެކަމުގެ ޔަގީންކަން އެ ކުންފުނިން ދީފައި ވާކަމަށެވެ.
މ. ރަތްމަންދޫ މީހުން އެހެން ރަށަކަށް ބަދަލުވާން އެދޭ ނަމަ އެ ބަދަލުވާ ރަށެއްގައި ގެ އަޅަން ފަށާތާ އަހަރެއްގެ ތެރޭ އެންމެން ބަދަލުކޮށް ދީ ނިންމާނެކަމަށް ރައީސް ޑރ. މުހައްމަދު މުއިއްޒު ވަނީ ވިދާޅުވެފައެވެ.
ރަތްމަންދޫ މީހުން އެހެން ރަށަކަށް ބަދަލުކުރާނީ ތިން ކޮޓަރީގެ ގެއެއް އަޅާދިނުމަށްފަހުކަމަށްވެސް ރައީސް ވިދާޅުވި އެވެ. އަދި ބަދަލުވާ އާއިލާތަކަށް މިހާރު ދެމުން އަންނަ 50000 ރުފިޔާގެ ފައިސާގެ އަދަދުވެސް ބޮޑުކުރާނެކަމަށް ރައީސް ވިދާޅުވި އެވެ.
