ރައްޔިތުންގެ މަޖިލީހުގެ މިއަދުގެ ޖަލްސާގައި ހުޅުމާލެ އުތުރު ދާއިރާގެ މެންބަރު ހުސައިން ޝަރީފު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ޝަހީމް ވިދާޅުވީ އިދާރީ ގޮތުންނާއި މިސްކިތް ޑިޒައިންކޮށްފައި ހުރި ގޮތުން އެސްޖޭ ކުންފުންޏަށް ވަރަށް ބޮޑެތި ދަތިތަކާ ކުރިމަތިވި ކަމަށެވެ.
މިނިސްޓަރު ވިދާޅުވި ގޮތުގައި އެ މިސްކިތުގެ އަމަލީ މަސައްކަތް މިހާރު ކުރިއަށް އެބަ ދެ އެވެ. އެ މިސްކިތް ނިންމުމަކީ ސަރުކާރުގެ އަޒުމެއް ކަމަށާއި މި ސަރުކާރުން އެ މިސްކިތް ނިންމައި ހުޅުވާނެ ކަމަށް ވެސް އޭނާ ވިދާޅުވި އެވެ.
ހުޅުމާލޭގެ ދެވަނަ ފިޔަވަހީގެ ހިޔާ ފްލެޓުތައް ކައިރީ، ސަލާޙުއްދީން ސްކޫލާ ޖެހިގެން އޮންނަ ބިމުގައި އެ މިސްކިތް ބިނާކުރުމުގެ އެއްބަސްވުމުގައި އިސްލާމިކް މިނިސްޓްރީ އާއި އެސްޖޭ ކޮންސްޓްރަކްޝަނާ ދެމެދު ސޮއިކޮށްފައި ވަނީ ޖެނުއަރީ 2022 ގަ އެވެ.
އެސްޖޭ ކުންފުންޏާ މި މަޝްރޫއު ހަވާލުކުރީ، މާލޭގެ ޒިކުރާ މިސްކިތް އެޅުމަށް އެ ކުންފުންޏާއެކު ވެފައިވާ އެއްބަސްވުން ބާތިލުކުރުމާ ގުޅިގެން، ލިބުނު ގެއްލުމުގެ ބަދަލުގެ ގޮތުގައި 141 މިލިއަން ރުފިޔާ ހޯދަން އެސްޖޭއިން ހުށަހެޅުމުން، ސަރުކާރާއެކު ކޯޓުން ބޭރުން ވެވުނު ސެޓްލްމަންޓް އެއްބަސްވުމެއްގެ ދަށުންނެވެ.
މައްސަލަ ބޮޑުވެފައިވާ އެސްޖޭގެ މިސްކިތް މިދިޔަ އަހަރުގެ ޑިސެމްބަރު މަހު ނިމޭނެ ކަމަށް މިނިސްޓަރު ޝަހީމް އެ އަހަރުގެ ކުރީކޮޅު ވިދާޅުވެފައި ވެ އެވެ.
