ކޯޓުން ވަނީ ތަބޫގެ ފޮޓޯއާއި އަޑު ބޭނުންކޮށްގެން އުފައްދާފައިވާ ނުބައި ކޮންޓެންޓްތަކާއި ޑީޕްފޭކްސް ސޯޝަލް މީޑިއާއިން ނައްތާލުމަށް އަންގާފަ އެވެ.
މި އަމުރާއެކު ދިއްލީ ހައިކޯޓުން ވަނީ ގޫގުލް، މެޓާ، އެކްސް އަދި ރެޑިޓް ފަދަ ބޮޑެތި ޓެކް ކުންފުނިތަކަށް ތަބޫއާ ގުޅޭ 150 އަށްވުރެ ގިނަ އިންޓަނެޓް ލިންކުތައް ވަގުތުން ނަގައި ނައްތާލުމަށް އަމުރުކޮށްފަ އެވެ. ތަބޫ ކޯޓަށް ހުށަހެޅި މައްސަލައިގައި ބުނެފައިވަނީ، އޭނާގެ ނަން ބޭނުންކޮށްގެން ސައްހަނޫން އިވެންޓް ބުކިންތަކާއި، ފޭކް މާޗަންޑައިޒް އަދި އޭއައި އިން އުފައްދާފައިވާ ހުތުރު ފޮޓޯތައް ފަތުރަމުންދާ ކަމަށެވެ.
ނެޝަނަލް އެވޯޑު ހޯދާފައިވާ އެކްޓްރެސްގެ އަބުރާއި އިއްޒަތް ހިމާޔަތްކުރުމަށް ދިއްލީ ހައިކޯޓުން ނެރުނު މި އަމުރަކީ، އޭއައިގެ ސަބަބުން ސެލެބްރިޓީންނަށް ކުރިމަތިވަމުންދާ ގޮންޖެހުންތަކުން ރައްކާތެރިވުމަށް ނެރުނު މުހިންމު އަމުރެކެވެ. މި އަމުރާއެކު ތަބޫގެ އަބުރަށް އުނިކަން އަންނަ ގޮތަށް އޭއައި ބޭނުންކުރުން ވަނީ މަނާވެފަ އެވެ.
