2024 ވަނަ އަހަރުގެ ޑިސެމްބަރު 12 ވަނަ ދުވަހު އަމީނީ މަގުގައި ހުންނަ ހައުސިން އެންޑް ކޮންސްޓްރަކްޝަން މިނިސްޓްރީ ހިމެނޭ އިމާރާތުގައި ހިނގި އަލިފާނުގެ ހާދިސާގައި އެ އިމާރާތްވަނީ އެއްކޮށް އަނދާ ހުލިވެފަ އެވެ. އަދި އެ ހާދިސާގައި ޖެހިގެން ހުރި އެންވަޔަރަމަންޓް މިނިސްޓްރީ އާއި ކޮންސްޓްރަކްޝަން މިނިސްޓްރީވެސް ވަނީ އެއްކޮށް އަނދާ ހުލިވެފަ އެވެ.
ރައްޔިތުން މަޖިލީހުގައި މިއަދު މެމްބަރަކު ކުރެއްވި ސުވާލަކަށް ޖަވާބު ދެއްވަމުން ހޯމް މިނިސްޓަރު އަލީ އިހްސާން ވިދާޅުވީ 3 މިނިސްޓްރީގައި ރޯވި ހާދިސާގެ ތަހުގީގު މިހާރު ނިމިފައިވާކަމަށެވެ. އެގޮތުން ތަހުގީގުން ބެލި ބެލުމުން އެތަނުގައި ގަސްތުގައި ބަޔަކު ރޯކޮށްލީ ނޫންކަމަށް އެނގޭކަމަށް އިހްސާން ވިދާޅުވި އެވެ. މިނިސްޓްރު އިހްސާން ވިދާޅުވީ އަލިފާން ރޯވީ އޭސީގެ ވަޔަރުތަކުގައިކަމަށެވެ.
އެ ހާދިސާގައި ގެއްލުން ލިބުނު ތިން މިނިސްޓްރީގެ މަސައްކަތްތައް ވަގުތީގޮތުން ވަނީ ދަރުބާރުގެއަށް ބަދަލުކޮށްފަ އެވެ. އަދި ސިޓީ ކައުންސިލުގެ މަސައްކަތްތައް ވަނީ އެ ކައުންސިލަށް ބަދަލުކޮށްފަ އެވެ.
