މިއީ މި ދައުރުގެ މުއްދަތު އިތުރުކުރި ދެވަނަ ފަހަރެވެ. މަޖިލީހުގެ ދައުރު 27 އޮގަސްޓުގެ ނިޔަލަށް އިތުރުކުރުމާމެދު މެންބަރުންނަށް ފެނިވަޑައިގަންނަވާ ގޮތަކަށް ވޯޓު ދެއްވުމަށް ހުޅުވާލި ފުރުސަތުގައި، ދައުރު ދަންމައިލުމަށް ފެންނަކަމަށް 58 މެންބަރަކު ވޯޓު ދެއްވި އެވެ.
އަދި ދައުރު އިތުރުކުރުމާ ދެކޮޅަށް 9 މެންބަރަކު ވޯޓު ދެއްވި އިރު، މި ވޯޓުގައި ޖުމުލަ 67 މެންބަރުން ބައިވެރިވެވަޑައިގެންނެވި އެވެ.
މަޖިލީހުގެ ގަވާއިދުގައިވާ ގޮތުން މަޖިލީހުގެ ދެވަނަ ދައުރު ހިނގާނީ ޖޫން މަހުގެ ފުރަތަމަ ދުވަހުން ފެށިގެން އޮގަސްޓް މަހުގެ 15 ވަނަ ދުވަހުގެ ނިޔަލަށެވެ.
މަޖިލީހުގެ ދައުރު އަނެއްކާވެސް އިތުރުކުރަން ހުށަހެޅުއްވީ މި ދައުރުގައި މަޖިލީހުން ނިންމުމަށް މުހިންމު މަސައްކަތްތަކެއް ހުރުމުންނާއި ބައެއް މަސައްކަތްތައް ކޮމިޓީ މަރުހަލާގައި ކުރިއަށްދާތީ ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވި އެވެ.
