ފަހުމީ "ސީއެންއެމް" އަށް ވިދާޅުވި ގޮތުގައި އެ ކުންފުނިން މި ވީހާ ތަނަށް އެ ފަދަ އުޅަނދެއް ގަނެފައި ނުވާ ކަމަށާއި އެއީ ކަނޑައެޅިގެން ދޮގު ވާހަކައެއް ކަމުގައި އެވެ.
އޭނާ ފާހަގަ ކުރެއްވި ގޮތުގައި އެއީ އެއްވެސް ވަރަކަށް ހަގީގަތެއް ވާހަކަތަކެއް ކަމަށާއި އެ ފަދަ ކޭސްއެއް ބޯޑަށް ވެސް ހުށަހެޅިފައި އެއް ވެސް ނުވާކަމުގައި އެވެ.
އެ ކުންފުނީގެ ބޯޑް މެމްބަރު ބޯޑުން ވަކިވީ އެ ފަދަ މައްސަލަ އަކާއި ގުޅިގެން ނޫން ކަމަށާއި އެ މެމްބަރު ބޯޑް ވަކިވީ އަމިއްލަ ސަބަބުތަކަކާއި ގުޅިގެން ކަމަށް ފަހުމީ އިތުރަށް ވިދާޅުވި އެވެ.
ފަހުމީ މިކަމާއި ގުޅިގެން މިއަދު ކުރެއްވި އެކްސް ޕޯސްޓެއްގައި ވިދާޅުވެފައިވަނީ 2023 ވަނަ އަހަރުން ފެށިގެން މި ހިސާބަށް އެ ފަދަ އެއްވެސް ކަހަލަ އުޅަނދެއް އެމްޑަބްލިއުއެސްސީން ގަންނަން ބޯޑަށް ހުށަހަޅާފައިވާ ކަން އޭނައަށް އެނގިފައި ނުވާ ކަމަށާއި އެ ފަދަ އުޅަނދެއް ގަތުމާއި ގުޅޭ ގޮތުން އެއްވެސް ފަރާތަކާއި މަޝްވަރާވެސް ކުރެވިފައިވާ ކަން އެނގިފައި ނުވާ ކަމުގައި އެވެ.
އޭނާގެ އެ ޕޯސްޓުގައި އިތުރަށް ވާ ގޮތުން ހަގީގަތެއް ނެތް ވާހަކަތައް އާންމުންގެ ތެރެއަށް ނެރޭ އިރު ކޮންމެވެސް ވަރަކަށް އެކަމަށް ބާރުދޭ ލިއެކިއުމެއް ވެސް އާންމުންނައް ދައްކަން ޖެހޭނެ ކަމުގައި އެވެ.
ސޯޝަލް މީޑިއާގައި ދައުރުވަމުން އަންނަ ޕޯސްޓުގައި ވާގޮތުން އެމްޑަބްލިއުއެސްސީން ވަނީ އިނގުރައިދޫ ދާއިރާގެ މަޖިލީސް މެމްބަރު އަދި ވެރިކަން ކުރާ ޕީއެންސީގެ ޕާލިމެންޓަރީ ލީޑަރު އިބްރާހިމް ފަލާހްގެ އަތުން 17 މިލިއަންއަށް ބާ އުޅަންދެއް ގަންނަން ނިންމާފައި ކަމަށާއި އެ ކަން ބޯޑަށް ހުށަހެޅުމުން އެކަމާއި ނުރުހުން ފާޅު ކޮށް ބޯޑު މެމްބަރަކުވެސް އިސްތިއުފާ ދީފައި ވާ ކަމުގައި އެވެ.
