އެމެރިކާގެ މި ނިންމުމާއެކު ދިވެހި ސަރުކާރުން ވަނީ އެގައުމުގެ ސަރުކާރަށާއި ރައްޔިތުންނަށް މަރުހަބާ ކިޔައިފަ އެވެ. އަދި އެގައުމުގައި ސުލްހަ އާއި ހަމަޖެހުމާއި ތަނަވަސްކަން ދެމިއޮތުމަށް ވަނީ އެދިފަ އެވެ.
ދިވެހި ސަރުކާރުގެ ފަރާތުން ފޮރިން މިނިސްޓްރީން މިއަދު ނެރުނު ބަޔާނެއްގައި ބުނީ އެމެރިކާގެ މި ނިންމުމާއެކު ސީރިއާ އަލުން އާރާސްތުކުރުމަށް އިތުރު ބާރެއް ލިބި، އެގައުމުގެ ރައްޔިތުންގެ ދިރިއުޅުމުގެ ފެންވަރު އެތައް ގުނައަކުން ރަނގަޅު ވެގެންދާނެ ކަމަށް އުންމީދު ކުރާ ކަމަށެވެ.
އެމެރިކާއިން އެކުލަވައިލާފައިވާ ޓެރަރިޒަމަށް ވާގިވެރިވާ ދައުލަތްތަކުގެ ލިސްޓުގައި ސީރިއާ ހިމެނީ 1979 ވަނަ އަހަރުގެ ޑިސެމްބަރު މަހު އެވެ.
މި ލިސްޓުން ސީރިއާ އުނިކުރުމާއެކު، ސީރިއާއަށް ބޭރުގެ އެހީ ދިނުމާއި، ދިފާއީ ސާމާނު ވިއްކުމާއި، މާލީ މުއާމަލާތްތަކަށް އަޅާފައިވާ ދަތިކުރުމުގެ ފިޔަވަޅުތަކަށް ބޮޑެތި ލުއިތަކެއް ލިބިގެންދާނެ އެވެ. އަދި ބޭރުގެ އިންވެސްޓަރުންނާއި ބޭންކުތަކުން ސީރިއާއާއެކު މުއާމަލާތްކުރުމަށް އޮތް ހުރަސް ނެތިގެންދިޔައީ އެވެ.
މީގެ އިތުރުން، ކުރިން އަލް-ގައިދާއާ ގުޅުން އޮތް އަދި އަލް-ޝަރާއު އިސްކޮށް ހުންނެވި "ހަޔާތު ތަހުރީރުއްޝާމް" ނުވަތަ އަލް-ނުސްރާ ފްރަންޓް ޓެރަރިސްޓް ޖަމާއަތްތަކުގެ ލިސްޓުންވެސް ވަނީ އުނިކޮށްފަ އެވެ.
