މިއީ ބަލިމީހުންގެ ސިއްހަތު ރަނގަޅުކުރުމަށް ދެވޭ ފަރުވާއެއްގެ ގޮތުގައި ސްވިޑަންގެ ގުދުރަތީ ރީތިކަމާއި ސަގާފަތުގެ ތެރެއިން ހިތްހަމަޖެހުން ހޯދުމަށް ފެށި ތަފާތު ޕްރޮގްރާމެކެވެ.
މި ޕްރޮގްރާމްގެ ދަށުން މައިގަނޑު ގޮތެއްގައި ބާރުއަޅަނީ ގުދުރަތީ ވެށީގައި ވަގުތު ހޭދަކުރުމަށާއި، މީހުންނާ ގުޅުން ބަދަހިކުރުމުގެ މައްޗަށެވެ. މީގެ ތެރޭގައި ޖަންގަލިތަކުގައި ވަގުތު ހޭދަކުރުމާއި، ފިނި ފެނަށް އެރުމާއި، ތަރިތަކުގެ ދަށުގައި ނިދުމުގެ އިތުރުން ސްވިޑަންގެ ސަގާފީ ކޮފީ ބްރޭކް ނުވަތަ "ފީކާ" ގައި ބައިވެރިވުން ހިމެނެއެވެ.
މި ކެމްޕޭނަކީ ހަމައެކަނި ޓޫރިޒަމް އިޝްތިހާރު ކުރުމަށް ފެށި ކަމެއް ނޫނެވެ. ވިސިޓް ސްވިޑަން އިން މައުލޫމާތު ދޭ ގޮތުގައި، މި ޕްރޮގްރާމްގައި ހިމެނޭ ކަންކަމަކީ ސިއްހަތަށް ފައިދާހުރި ކަންކަން ކަމަށް ކަރޮލިންސްކާ އިންސްޓިޓިއުޓްގެ ސީނިއާ ޕްރޮފެސަރު އީވޯން ފޯސެލް ވަނީ ދިރާސާކުރައްވައި ކަށަވަރުކޮށްދެއްވާފައެވެ. އަދި ބަލިމީހުންނަށް އަމިއްލައަށްވެސް އެމީހުންގެ ޑޮކްޓަރުންނާ މަޝްވަރާކުރުމަށް ހާއްސަ ފޯމެއް ޑައުންލޯޑު ކުރެވޭނެ އިންތިޒާމު ވަނީ ހަމަޖައްސާފައެވެ.
މިކަމާ ގުޅޭގޮތުން ވިސިޓް ސްވިޑަން އިން ބުނީ، މިއީ ސަރުކާރުން ހަރަދުދީފައި ބަލިމީހުން ފޮނުވާ ފަރުވާއެއް ނޫން ކަމަށެވެ.
ޑޮކްޓަރުންގެ ބޭސް ސިޓީއަކާއެކު ޗުއްޓީއަކަށް ދިއުމަކީ އާންމުކޮށް އިވޭ ކަމަކަށް ނުވިޔަސް، މިއީ ސިއްހަތާއި ޓޫރިޒަމް ގުޅުވާލުމަށް ސްވިޑަންއިން ކުރި ވަރަށް ތަފާތު މަސައްކަތެކެވެ. މީގެ ސަބަބުން، ބަލިތަކުން ދުރުވުމަށާއި ސިކުނޑީގެ ހަމަޖެހުމަށްޓަކައި ދަތުރުކުރުމުގެ މުހިންމުކަން ގިނަ ބަޔަކަށް ވިސްނި، މިފަދަ ޗުއްޓީތަކަށް ދާ މީހުންގެ އަދަދު އިތުރުވެގެންދާނެ ކަމަށް ބެލެވެއެވެ.
