މި މައްސަލައިގައި ދައިމޯފިން ޓްރެފިކް ކުރުމުގެ ދައުވާ ސާބިތުވެ ހުކުމް އައީ ހދ. ނޭކުރެންދޫ، ސާޒް، އިބްރާހީމް ރިސްފާން އާއި މ. ވިލާތުކުންނާރުގެއާގެ، މުޙައްމަދު ޒަޢީންގެ މައްޗަށެވެ. މި ދެ މީހުން ހައްޔަރުކުރީ ފްލެޓްތަކާއި އުޅަންދޫތައް ބަލައިފާސްކޮށް 968.6 ގުރާމުގެ މަސްތުވާތަކެތި ހޯދުމަށްފަހުއެވެ.
ޝަރީޢަތުގައި ދެ މީހުންވެސް ދައުވާއަށް އިއުތިރާފުވެ، ދައުލަތާއެކު އިއުތިރާފު އެއްބަސްވުން ހަދާފައިވާތީ، މި ކުށަށް އަންނަ އަސާސީ އަދަބު ކަމަށްވާ 25 އަހަރުގެ ޖަލު ހުކުމާއި 100,000 ރުފިޔާގެ ޖޫރިމަނާ ވަނީ ދެބައިކުޅައެއްބަޔަށް ލުއިކޮށްދީފައެވެ.
