ސަލްމާން ހާން މި ޝޯ ހޯސްޓުކޮށްދިނުމަށް އެއްބަސްވެފައިވަނީ ވަރަށް ބޮޑު އަގެއްގައި ކަމަށް މީޑިއާތަކުން ވަނީ ރިޕޯޓުކޮށްފައެވެ. އެގޮތުން، މިފަހަރުގެ މުޅި ސީޒަނަށް އޭނާ 120 ކްރޯޑު ރުޕީސް ނަގާނެ ކަމަށް ރިޕޯޓުތައް ބުނި ނަމަވެސް، މިއީ އަދި ރަސްމީކޮށް ކަށަވަރުކޮށްދީފައިވާ އަދަދެއް ނޫނެވެ.
ސަލްމާން ހާންއަށް ދޭން ހަމަޖެހިފައިވާ ފައިސާގެ އަދަދާ ގުޅޭގޮތުން ދެކެވެމުންދާ ވާހަކަތަކަށް ޝޯ އުފައްދާ ފަރާތުންވެސް އަދި ސަލްމާންގެ ޓީމުންވެސް ވަކި އެއްޗެއް ބުނެފައެއް ނުވެއެވެ. އާންމުކޮށްވެސް ބިގް ބޮސްގެ އާ ސީޒަނެއް ފަށާއިރު ސަލްމާންގެ އަގާ ގުޅޭގޮތުން މިފަދަ ތަފާތު ވާހަކަތައް އަބަދުވެސް ފެތުރެއެވެ.
ބިގް ބޮސްގެ އެތައް ސީޒަނެއް ސަލްމާން ހާން ވަނީ މީގެ ކުރިންވެސް ވަރަށް ކާމިޔާބުކަމާއެކު ހޯސްޓުކޮށްދީފައެވެ. އޭނާގެ ހުށަހެޅުންތަކާއި، ބައިވެރިންނާއެކު ބާއްވާ ގުޅުމަކީ މި ޝޯއަށް ބެލުންތެރިންގެ މެދުގައި އެހާ ބޮޑު މަގުބޫލުކަމެއް ލިބިގެންދާ އެއް މައިގަނޑު ސަބަބު ކަމަށް ގިނަ ބަޔަކު ގަބޫލުކުރެއެވެ.
މި ހަފްތާބަންދުގައި ބިގް ބޮސް ސީޒަން 20 ގެ ޕްރިމިއާ ވަރަށް ކުލަގަދަކޮށް ބޭއްވުމަށް ހަމަޖެހިފައިވާއިރު، މި ޝޯއަށް އިންތިޒާރުކުރަމުންދާ ފަރާތްތަކުން ތިބީ ވަރަށް ބޮޑަށް ޝައުގުވެރިވެފައެވެ. އާ ސީޒަންގައި ފެނިގެންދާނެ ބައިވެރިންނާއި، ޝޯގެ ތެރެއިން ފެންނާނެ އާ ކަންތައްތައް ބެލުމަށް ގިނަ ބަޔަކު ދަނީ އިންތިޒާރު ކުރަމުންނެވެ.
