ނިއުޓްރިޝަންގެ މައުލޫމާތުތައް ދައްކާ ގޮތުން، 100 ގްރާމްގެ ހިއްކި އެޕްރިކޮޓްގައި 3.2 މިލިގްރާމްގެ އަޔަން އެކުލެވިގެންވެ އެވެ. މިއާ ހިލާފަށް ހަމަ އެ މިންވަރުގެ ގެރިމަހުގައި ހުންނަނީ 2.7 މިލިގްރާމްގެ އަޔަންއެވެ. އެހެންނަމަވެސް، މޭވާގެ ބާވަތްތަކުން ލިބޭ އަޔަން އަކީ "ނޮން-ހީމް" އަޔަން ކަމަށްވުމުން، މިއީ މަހުގެ ބާވަތްތަކުން ލިބޭ އަޔަންއާ އަޅާބަލާއިރު ހަށިގަނޑަށް ނަގައިގަންނަން ތަންކޮޅެއް އުނދަގޫ ބާވަތެކެވެ.
އަޔަންގެ އިތުރުން ހިއްކި އެޕްރިކޮޓްގައި "ބީޓާ-ކްރިޕްޓޮޒެންތިން" ނަމަކަށް ކިޔާ މުހިންމު އެންޓިއޮކްސިޑެންޓެއް ހިމެނެއެވެ. މިއީ ފުއްޕާމޭގެ ސިއްހަތު ރަނގަޅުކޮށްދީ، ނޭވާލާ ނިޒާމުގެ ބަލިތަކުން ދުރުކޮށްދިނުމަށް ވަރަށް ބޮޑަށް އެހީތެރިވެދޭ މާއްދާއެކެވެ. މި މާއްދާގެ ސަބަބުން ފުއްޕާމޭގެ ސެލްތަކަށް ލިބޭ ގެއްލުންތައް ކުޑަކޮށްދެ އެވެ.
އެމެރިކާގެ ނޭޝަނަލް އިންސްޓިޓިއުޓްސް އޮފް ހެލްތު (އެންއައިއެޗް) އިން ކޮށްފައިވާ ދިރާސާތަކާ ހަވާލާދީ ސިއްހީ މާހިރުން ބުނެފައިވަނީ، ބީޓާ-ކްރިޕްޓޮޒެންތިން އެކުލެވޭ ކާނާ ގިނައިން ބޭނުންކުރާ މީހުންނަށް ފުއްޕާމޭގެ މައްސަލަތައް ދިމާވުމުގެ ފުރުސަތު ކުޑަ ކަމަށެވެ. އަދި ޔޫރަޕިއަން ޖާނަލް އޮފް ކްލިނިކަލް ނިއުޓްރިޝަންގައި ޝާއިއުކޮށްފައިވާ ރިޕޯޓެއްގައި ބުނެފައިވާ ގޮތުން، ގަސްގަހާގެހިން ލިބޭ ނޮން-ހީމް އަޔަން ހަށިގަނޑަށް އެންމެ ފުރިހަމައަށް ނެގުމަށްޓަކައި ވިޓަމިން ސީ އަކީ ވަރަށް މުހިންމު ދައުރެއް އަދާކުރާ އެއްޗެއް ކަމަށް އެ ރިޕޯޓުގައި ބުނެފައިވެ އެވެ.
އެހެންކަމުން ހިއްކި އެޕްރިކޮޓުން ލިބޭ ފައިދާ އެންމެ ފުރިހަމަ ގޮތުގައި ހޯދުމަށްޓަކައި، ލުނބޯ ނުވަތަ އޮރެންޖް ފަދަ ވިޓަމިން ސީ އެކުލެވޭ ކާނާއަކާއެކު މިއީ ބޭނުންކުރުން ރަނގަޅު މޭވާއެކެވެ. މިއީ އަޔަން އެކުލެވޭ މަހުގެ ބާވަތްތައް މުޅިން ދޫކޮށްލާފައި ކާންޖެހޭ އެއްޗެއް ނޫން ނަމަވެސް، ޔޯގަޓް އަދި ނަޓްސް އާއެކު ލުއި ކާނާއެއްގެ ގޮތުގައި ބޭނުންކޮށްލަން މިއީ ސިއްހަތަށް ވަރަށް ފައިދާހުރި ބާވަތެކެވެ.
