ދެހާސް ދެ ވަނަ އަހަރު، ބްރެޒިލްއާއި އެކު ވޯލްޑްކަޕް ކާމިޔާބު ކުރި، އެޑިލްސަން ބުނާ ގޮތުގައި އޭނާއަކީ އާޖެންޓީނާގެ ލިއޮނަލް މެސީ، ޕޯޗުގަލްގެ ކްރިސްޓިއާނޯ ރޮނާލްޑޯ އަދި ބްރެޒިލްގެ ނޭމާއަށްވުރެ މާ މޮޅު ކުޅުންތެރިއެކެވެ. އޭނާ ބުނި ގޮތުގައި، އޭނާގެ އެންމެ މޮޅު އިރު ރޮނާލްޑޯ، މެސީ އަދި ނޭމާއަށް ވުރެ އޭނާ މާ މޮޅުވާނެއެވެ.
މެސީ، ރޮނާލްޑޯ އަދި ނޭމާއަށްވުރެ މޮޅު ކަމަށް ދައުވާ ކުރާ އެޑިލްސަން
ރޮނާލްޑޯ، މެސީ އަދި ނޭމާއަށްރުރެ މޮޅު ކަމަށް އަމިއްލައަށް އެޑިލްސަން ދައުވާ ކުރި ނަމަވެސް އޭނާއަކީ ބްރެޒިލް ޓީމުންވެސް މާ ގިނައިން ޖާގަ ލިބުނު ކުޅުންތެރިއެއް ނޫނެވެ. އަދި އެއް އިރަކުވެސް މާ މަޝްހޫރު ނޫނީ މާ ކާމިޔާބުވެސް ކުޅުންތެރިއެއް ނޫނެވެ.
ބްރެޒިލަށް މުޅި ޖުމްލަ އޭނާ ކުޅުނީ، އެކާވީސް މެޗެވެ. ގިނަ މެޗުތަކުގައި ކުޅުނީވެސް ބަދަލު ކުޅުންތެރިއެއްގެ ގޮތުގައެވެ. އަދި އޭނާއަށް ބްރެޒިލްއަށް ޖަހާދެވިފައިވަނީ އެންމެ ހަ ގޯލެވެ. ކެރިއަރުގައި ބާރަ ކްލަބަށް ކުޅުނު އެޑިލްސަންއަށް ކްލަބު ލެވެލްގައި ލިބުނު އެންމެ ބޮޑު ކާމިޔާބަކީ އެއް ފަހަރު ކްލަބު ވޯލްޑްކަޕް ކާމިޔާބުކުރެވުމެވެ. އޭނާއަކީ ދުނިޔޭގެ އެންމެ މޮޅު ކުޅުންތެރިންގެ ލިސްޓަށް ދުވަހަކުވެސް ނޮމިނޭޓްވެސްވީ ކުޅުންތެރިއެއް ނޫނެވެ.
