އެ މަނިކުފާނުގެ މި މެސެޖް ވަނީ އަމިއްލަ ސޯޝަލް މީޑިއާ އެކައުންޓްގައި ހިއްސާ ކުރައްވައިފި އެވެ.
އިސްލާމް ދީނަށް އެއްވެސް ލޮޅުމެއް އައިސްދާނެފަދަ ގޮތަކަށް ކާބަފައިން އަމަލުކޮށްފައި ނުވާކަމަށާއި އިސްލާމްދީނުގެ މަތީގައި ދިވެހިިން މިހާތަނަށް ދެމި ތިބީ ސާބިތުކަމާއެކުކަމަށް އެމަނިކުފާނު ވިދާޅުވިއެވެ. އެހެންކަމުން ކުރިއަށް އޮތްތަނުގައިވެސް އިސްލާމް ދީނުގެ ހިދާޔަތުގައި ދެމި ތިބެންޖެހޭކަމަށް ކުރީގެ ރައީސް މައުމޫން ޢަބަދުލްޤައްޔޫމް ވިދާޅުވިއެވެ.
ރާއްޖެއަށް އިސްލާމްދީން އައީ ހިޖުރައިން 548 ވަނަ އަހަރު (މީލާދީން 1153) އެވެ.
ރާއްޖޭގެ ގާނޫނުއަސާސީ ބުނާގޮތުން ދިވެހިރައްޔިތަކަށް ވެވޭނީ މުސްލިމަކަށް ވެގެންނެވެ. އަދި ރާއްޖޭގެ ގާނޫނުތަކުގެ މައިގަނޑު އަސާސަކީ އިސްލާމީ ޝަރީއަތެވެ. ރާއްޖެ އިސްލާމްވި ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ރަބީޢުލްއާޚިރު މަހުގެ 2 ވަނަ ދުވަހެއެވެ.
ރާއްޖެ އިސްލާމްވިތާ 900 އަހަރު ފުރުމާ ދިމާކޮށް ސަރުކާރުން ރޭ ވަނީ އެކަމާ ގުޅުވައި ރޭ ހާއްސަ ޖަލްސާއެއް ވެސް ބާއްވައިފަ އެވެ. އެ ޖަލްސާގައި ރައީސް ޑރ. މުހައްމަދު މުއިއްޒުގެ އިތުރުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވާހަކަ ދެއްކެވި އެވެ.
