މިރޭ ކުރިއަށްދިޔަ މި ކޮންގްރެސްގެ ރަސްމީ ޖަލްސާއަށް ވަނީ ސިޔާސީ ޕާޓީތަކުގެ ލީޑަރުންނަށް ދައުވަތު އަރުވައިފަ އެވެ. މިއީ އާއްމުކޮށް ވެސް ކުރާ ކަމެކެވެ. އެގޮތުން މިރޭގެ ޖަލްސާގައި އެމްޑީޕީގެ އިތުރުން އެމްއެންޕީ އަދި އަދާލަތު ޕާޓީގެ ލީޑަރުން ވަނީ ބައިވެރިވެވަޑައިގެންފަ އެވެ.
ނަމަވެސް މިއީ ކުރިން ވެރިކަން ކުރެއްވި ބޭފުޅަކު މިފަދަ ޖަލްސާއެއްގައި ބައިވެރިވެވަޑައިގެންނެވި ފުރަތަމަ ފަހަރެވެ. އެގޮތުން ރައީސް ޑރ. މުހައްމަދު މުއިއްޒު ވަނީ އެ ޖަލްސާއަށް ނަޝީދަށް މަރުހަބާ ދަންނަވައި، ސަލާމް ކުރައްވައިފަ އެވެ.
ފާހަގަކޮށްލެވޭ ގޮތުގައި މީގެ ކުރިން ނަޝީދު ވަނީ، އެމަނިކުފާނުގެ ވެރިކަމަށްފަހު ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވެރިކަމުގެ ހުވާކުރެއްވި ރަސްމިއްޔާތަށް ވެސް ވަޑައިގެންފަ އެވެ.
ޕީއެންސީގެ ކޮންގްރެސްގައި އެ ޕާޓީގެ މަގާމުތަކަށް ގިނަ ބަޔަކު ވާދަކުރާއިރު އެތެރޭގެ އިންތިހާބުގައި ހޮވަނީ އެ ޕާޓީގެ ޒުވާނުންގެ ހަރަކާތުގެ ރައީސާއި ނައިބު ރައީސާއި ސެކްރެޓަރީ ޖެނެރަލް އާއި ހަޒާންދާރު އަދި އަންހެނުންގެ ހަރަކާތުގެ ވެސް ހަމަ އެ މަގާމުތަކަށެވެ.
