ރައީސް މިފަދައިން ވިދާޅުވީ ރައްޔިތުންގެ ޝަކުވާތައް ސީދާ ރައީސްއާ ހިއްސާ ކުރުމަށް ކުރިއަށް ގެންދާ ރައްޔިތުންގެ އަޑު ޕްރޮގްރާމްގައި ނުކުޅެދުންތެރިކަން ހުންނަ ދެމަފިިރިއަކު ހިއްސާކުރި ޝަކުވާތައް އެއްސެވުމަށްފަހު އެވެ.
އަޑުއިވުމުން މަހުރޫމްވެފައިވާ އެ ދެމަފިރިން ބުނި ގޮތުގައި، އެމީހުން ދިރިއުޅޭ އިމާރާތުގައި ނުރައްކާތެރި ހާދިސާއެއް ހިނގި ނަމަވެސް އެކަން އެނގޭ ގޮތެއް ނެތް ކަމަށެވެ. އެހެންކަމުން އެދެމަފިރިން ފަދަ ނުކުޅެދުންތެރިކަން ހުންނަ ފަރާތްތަކަށް އެފަދަ ހާދިސާއެއް ހިނގައިފިނަމަ އެކަން އެނގޭނެ ނިޒާމެއް ގާއިމްވެފައި ހުރުމަކީ މުހިންމު ކަމެއްކަން ފާހަގަކޮށްފައިވެ އެވެ.
ތިން ކުދީން ވެސް ލިބިފައިވާ އެ ދެމަފިރީން ވަނީ އެ މީހުންގެ މުސްކުޅި ބައްޕަ، ފަރުވާއަށް ގެންދަން ޖެހޭ ޙާލަތުގައި އުޅެން ޖެހޭ ދަތި ޙާލުގެ ވާހަކަ އާއި ވަޒީފާގެ މާޙައުލުގައި ހުރި ދަތިތަކާއި ކުދީންގެ ބެލެނިވެރީންގެ ގޮތުގައި ސުކޫލަށް ދާއިރު ދިމާވާ ދަތިތައް ރައީސާއި ހިއްސާކުރައްވާފަ އެވެ.
އަދި އެހެނިހެން ހިދުމަތްތައް ހޯދުމުގައި ހުރި ދަތިތައްވެސް ހިއްސާކުރެއްވި އެވެ. ފްލެޓް ދޭއިރު އެންމެ ތިރީގެ ފްލޯތައް ނުކުޅެދުންތެރިކަން ހުންނަ މީހުންގެ އާއިލާތަކަށް ހާއްސަ ކުރުމަށް ވެސް އެދުނެވެ.
ބޯހިޔާވަހިކަމުގެ މަޝްރޫއުތަކުން ފްލެޓް ދޫކުރާއިރު، ނުކުޅެދުންތެރިކަން ހުންނަ ފަރާތްތަކުގެ އާއިލާތަކަށް އެންމެ ތިރީ ފަންގިފިލާތައް ހާއްސަކޮށްދިނުމަކީ މިހާރު ވެސް ބަލާ ކަންތައްތައް ކަމަށާއި އެކަމަކު އިތުރަށް އެ ކަންކަން ބަލައި އެފަދަ މީހުން މީހުން ދިރިއުޅެމުންދާ އިމާރާތްތަކުގައި ވެސް އެފަދަ ފަރާތްތަކަށް ރައްކާތެރި އަދި ލުއިފަސޭހަ އިންތިޒާމުތަކެއް ހަމަޖެއްސެވުމަށް ސަރުކާރުން ހާއްސަ އިސްކަމެއް ދެއްވާނެ ކަމުގައި ރައީސް ވިދާޅުވި އެވެ.
