"ސޮރީ ސޮރީ އައި މިސްޑް ބައްޕަ އެންޑް މަންމަ.. އެކަމަކު ގޭގައިވެސް ވަރަށް މަޖާ.." ބީނިޝްގެ ޖަވާބުން އަހަންނަށް އައި ބަދަލުފެނުމުން، އުފަލާއެކު ބުނެލި އެވެ.
"މަންމާ ޔޫ ހެޕީ ވިތް ބައްޕަ؟" އާދަޔާ ހިލާފު ކުއްލި ސުވާލެކެވެ.
ބީނިޝްގެ މޫނަށް ބަލައިލާން މަޖުބޫރުވި އެވެ. ފެނުނީ އުއްމީދުގެ ދޯދިތަކުން ވިދާބަބުޅަމުންދިޔަ ނުހަނު ހިތްގައިމު ދެ ލޮލެވެ. ބަޔާންކުރާން ނޭނގޭ އިހްސާސަކުން އަހަރެންގެ ދެ ލޯ ފެންކަޅިވި އެވެ.
ދަރިންނަކީ ހާދަހައިވާ ބޮޑު ނިއުމަތެކޭ ހިތަށް އެރި އެވެ. އަހަރެންނާއިމެދު މި ކުޑަކުޑަ ދަރިފުޅު ވިސްނާ މިންވަރު އިހްސާސްވުމުން ލޮލުގެ ކަރުނަ ނުހިފެހެއްޓުނެވެ.
ހަނދާން ހުންނާން ފެށީންސުރެންވެސް އަހަރެންގެ ހަޔާތުގައި ދިމާވަމުން އައި ކަންތައްތަކުގެ މާޒީއަށް ދަތުރުކުރާކަށް ނެތީމެވެ.
"މަންމަ ވަރަށް ވަރަށް އުފަލުން މިހުރީ.. ބައްޕައާއި މަންމަގެ މެރިޑް ލައިފަށް، މަންމަގެ ދަރިފުޅު އޯކޭތަ؟ ދަރިފުޅު އުފާވޭތަ؟" ބީނިޝްގެ މޫނުގައި ފިރުމާލަމުން އަހަރެން ސުވާލުކުރީމެވެ.
"ޔެސް މަންމާ! ބައްޕަ އިޒް ދި ބެސްޓް!" ލޯތްބާއެކު ބުނެލި އެވެ.
ބީނިޝްގެ ބޮލުގައި ބޮސް ދިނީމެވެ.
"އައްސަލާމް އަލައިކުމް" މާލިކްގެ އަޑު އިވުމުން އަހަރުމެން ދެމައިންގެ ސަމާލުކަން އޭނާއަށް ހުއްޓުނެވެ.
ހުދު ގަމީހަކާއި ބެއިޖް ފަޓުލޫނަކާއި ކޮފީ ބްރައުން ބެލްޓް، އަހަރެންގެ ސަމާލުކަން ހޯދި އެވެ. މާ ޝާ ﷲ އެވެ.
ކޮންފަދަ ފުރިހަމަކަމެއް ހެއްޔެވެ؟ އަހަރެންނާއި ބީނިޝްގެ ނަސީބަށްޓަކައި ހިތުގެ އެންމެ އަޑިން ޝުކުރުވެރިވީމެވެ.
އަތުގެ މުލައްދަނޑިއާއި ހަމައަށް އަތް އޮޅާލާފައިވާ ފުރިހަމަކަމުން އަހަރެންގެ ތުންފަތްމަތީގައި ލަދުވެތި ހިނިތުންވުމެއް ދުވެލި އެވެ. ވަށައިގެންވާ މާހައުލުގެ ހަސަދަވެރި ބެލުންތަކުން އަހަރެންގެ 'ލޯބި' ރައްކާތެރި ކުރައްވާތޯ ދުއާ ދެންނެވީމެވެ.
"ސަލާމް ބައްޕާ"
"ބައްޕަގެ ލޯބިލޯބި ކަޕްކޭކް.."
ބީނިޝް އުރާލުމާއެކު ނުހަނު ލޯބިން ބޮނޑިކޮށްލާފައި މޫނާއި ބޮލުގައި މާލިކް ބޮސްދިނެވެ.
"ވެއައ އިޒް ފަހޫ..؟" ބީނިޝްގެ ސުވާލު އައީ މާލިކް އަށެވެ.
"ފަހޫ..؟ ހޫ ފަހޫ..؟" މާލިކް ސުވާލުކޮށްލީ ދެ ބުމަ ދޭތެރެއަށް ރޫ އަރުވާލާފަ އެވެ.
މާލިކްގެ ސުވާލާއެކު ބީނިޝްގެ އަތްތިލަ ނިއްކުރީގައި ތަތްކޮށްލައިފި އެވެ.
"ބައްޕާ.. ފަހޫ އިޒް ފަހަދު!" ބީނިޝްގެ ތަފްސީލާއެކު އަހަރެންނާއި މާލިކްގެ ހިނިގަނޑު ފަޅައިގެން ދިޔައީ ނުހަނު ބާރަށެވެ.
ރޭގެ ކުޅިވަރުގައި މުޅިން އައު ނަމެއްވެސް ވުޖޫދުވީތޯ މާލިކް ސުވާލު ކުރި އެވެ. ގަދަޔަށް ހެމުން ބިންމަތީގައި ބީނިޝް ބަހައްޓައިލި އެވެ.
"ކަޕްކޭކްގެ ފަހޫ ވެއްޖެ ކޮޓަރީގައި"
"އޯހ ނޯހ"
ޅިނދުގައި ދެ އަތް ވިއްދާލާފައި މޫނުމައްޗަށް ރޫ އަރުވާލާފައި ދެ ކޯވެސް ފުއްޕާލި އެވެ.
"ވަޓްސް ރޯންގް ބޭބީ ގަރލް؟" މާލިކް ސުވާލު ކުރި އެވެ.
"ހީ ސްޓޯލް މައި ޗޮކޯ، ހީ އީޓިން އިޓް ނައު އައި ނޯ.. އައި ހޭވް ޓު ގޯ" ނުހަނު ބާރަށް ދުއްވައިގަންނަމުން ބީނިޝްގެ ޖުމުލައަށް ބަސްތަށް އިތުރު ކުރި އެވެ.
ހީވާ ހީވުމަށް މައްސަލައަކީ ބޭބެގެ ކޮޓަރީގައި ބީނިޝް ބާއްވާފައި އޮތް ޗޮކްލެޓެކެވެ. ބީނިޝްއަށް ނުދީ ބޭބެ އޭތި ކާލަފާނެތީ އެވެ.
"ކެއަރފުލް!!" ބީނިޝް ދިޔަ ދިމާއަށް އެނބުރިފައި މާލިކް ގޮވައިލި އެވެ.
"ހެލޯ ބިއުޓިފުލް މަންމާ" އަހަރެންގެ ތުންފަތުގައި ލޯބިކޮށްލާފައި މާލިކް ބުނެލި އެވެ.
"އައި ލަވް ޔޫ"
"އައި ލަވް ޔޫ މޯ މާލިކް"
ލަދުވެތިކަމާއެކު އެސްފިޔަތަށް ތިރިކޮށްލަމުން ބުނީމެވެ.
ބަނޑުގައި ފިޔަޖަހާފައި ނަށަމުންދިޔަ ކޮކާތަކުގެ ހިލަމެއްވެސް މާލިކްއަކަށް ނޭގޭނެ އެވެ.
"އަހަރެން މި ދަނީ ބީނިޝްއަށް ސައިދޭން" މާލިކް ބުނެލި އެވެ.
"ޔޫ ލުކް ރިއަލީ ހޭންޑްސަމް މާލިކް"
"ތޭންކް ޔޫ މައި ޖާން"
މާލިކްގެ މޭގައި އަހަރެން ބޮސްދިނީމެވެ.
ބަދިގެ ސާފުކުރުމާއި އަހަރެން ގެންގުޅުނު ސާމާނު ހުންނާންޖެހޭ ތަންތަނުގައި ތަރުތީބު ކުރުމަށް ނިންމައި، ކުރިއަށް ފިޔަވަޅެއް އެޅި ވަގުތު ނުހަނު ބާރަށް އަހަރެންގެ ކަނާއަތުގައި ހިފައި ޖެހި ލުއްކިއަކާއެކު މާލިކްގެ މޭގައި އަހަރެންގެ ބުރަކަށި ތަތްކޮށްލި އެވެ.
"އަހަރެންނަށްޓަކައި ތިޔަށްވުރެން ފުރިހަމަ އަންހެނަކު މި ދުނިޔޭގައި ވުޖޫދުވެފައިވެސް ނުވޭ... އަހަރެންނާއި ބީނިޝްއަށްޓަކައި އެންމެ ފުރިހަމަ ބައިވެރިޔަކީ ކައިރާ.. ތިޔަވަރުގެ ފުރިހަމަ އަންހެނަކު އަހަރެން ދުވަހަކުވެސް ނުދެކެން.."
އަހަރެންގެ ބޮލުގެ އެތަން މިތަނުގައި މާލިކް ކިސްކުރަމުން ދިޔައިރު އޭނާގެ ބާރުގަދަ ދެ އަތުން އަހަރެންގެ ހަށިގަނޑު ބޮނޑިކޮށްލައިފި އެވެ.
...............
(ދެ ދުވަސް ފަސް)
"މަންމާ ސޯ ޕްރިޓީ" ކުޑަކުޑަ ދަރިފުޅުގެ އަޑެވެ.
އެންމެންގެ ސަމާލުކަން އަހަރެންގެ މިސްރާބަށް ހުއްޓުމަށް ސިކުންތެއްވެސް ނުނެގި އެވެ.
ބޭބެ އާއި ސަންދަލްގެ އަނގަ ހުޅުވި، ދެ މީހުން ހުއްޓުން އަރާފައި ތިބީ ދުނިޔެމަތީގެ ބޮޑު އަޖައިބެއް ފެނިގެން އާޝޯހްވެފައިވާ ފަދައިންނެވެ.
"ޔޫ ލުކް ބިއުޓިފުލް ޕްރިންސެސް" އަސަރާއެކު ބޭބެ ބުންޏެވެ. އަހަރެންގެ ނަސީބަށްޓަކައި ހަމްދުކުރީމެވެ.
ބާރުގަދަ ދަގައްފާނަކުން ވަކި ދިމާއަކަށް އަހަރެންގެ ޖަޒްބާތުތަށް ދަމާހެން ހީވެގެން އެ މިސްރާބަށް ބަލައިލީމެވެ. ހަށިގަނޑުގެ ހިމަ ލޯލިތަށް ކޮޅަށް ޖެހުނެވެ.
މާލިކް ބަލަހައްޓައިގެން ހުރި މަންޒަރު ސިފަކުރާނެ އިބާރާތެއް އަހަރެންގެ ބަސްފޮތުގައި ނެތެވެ.
ހަތަރުކަޅި ބައްދަލުވެގެން ދިޔަ ވަގުތު މުޅި ހަށިގަނޑު ތުރުތުރު އަޅުވައިލި އެވެ. ކަޅު ކަނޑެއް ފަދަ ފުން ދެލޮލުން ފެންނަމުންދިޔަ އަނދިރި އޮއެވަރު ތަރުޖަމާކުރާކަށް ނޭގުނެވެ.
ދުވަހަކުވެސް ދެކެފައިނުވާ ޖަޒްބާތެކެވެ.
ފީނުމަށް ނުކުޅެދޭފަދަ ފުން ކަނޑެކެވެ.
އިޝްގުން ފުރިފައިވާ ބެލުމެކެވެ.
އަހަރެންގެ މުޅި ހަށިގަނޑު ތުރުތުރު އަޅަނީ އެވެ.
އެ ލޮލާއި މާލިކްގެ މޫނަށް ބެލުމަކަށް ކުޅަދާނައެއް ނޫނެވެ.
"އުމްއުމމ.. ބީނިޝް ކަމް! ދަރިފުޅުގެ ބޯ ރީތިކޮށްލަން އާދޭ.." ގަސްތަކު ނޫނެވެ. އެހެން ވެސް ބުނެވުނީ އެވެ. ބީނިޝް މެދުވެރިކޮށްގެން ނޫނީ މިވަގުތު އަހަރެންގެ އިހްސާސްތަކުގައި ބުރަތްކެއް ނުޖެއްސޭނެ އެވެ. (ނުނިމޭ)
