ރައްޔިތުންގެ މަޖިލީހުގެ ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު މިދިޔަ އަހަރުގެ ޑިސެމްބަރު މަހު ވަޒީފާއާ ބެހޭ ގާނޫނުގެ 52 ވަނަ މާއްދާ އިސްލާހުކޮށް ސާވިސް ޗާޖްގެ ފައިސާ މުވައްޒަފުންނަށް ދޭއިރު ދިވެހި ރުފިޔާއަށް އެ ފައިސާ މާރުކޮށްގެން ނުވާނެ ކަމަށް ހަމަޖެއްސުމަށް ހުށަހެޅި އިސްލާހު އޮތީ ކޮމިޓީ މަރުހަލާގައި އޮންނަތާ ވަނީ އެތައް ދުވަހެއް ވެފަ އެވެ. 

އެކަމާ ކަންބޮޑުވުން ފާޅުކުރައްވައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ފޮނުއްވި ސިޓީއެއްގައި ވިދާޅުވީ، ބައެއް ރިސޯޓުތަކުން ސާވިސް ޗާޖު ދނީ ރުފިޔާއިން ކަމަށާއި އެއީ މުވައްޒަފުންގެ ކަންބޮޑުވުން އޮތް ކަމެއް ކަމަށެވެ. 

ޓޫރިޒަމް ދާއިރާގައި މަސައްކަތްކުރާ އެތައް މުވައްޒަފުންނަކަށް ލިބެންޖެހޭ ސާވިސް ޗާޖުގެ ހައްގު އެންމެ ފުރިހަމަ ގޮތުގައި ލިބިދިނުމަށް ހުރަސްއެޅޭ ކަމަށް ސިޓީގައިވެ އެވެ. 

ފަތުރުވެރިވެރިކަމުގެ ހިދުމަތް ދޭ ގިނަ ތަންތަނުގައި ސާވިސް ޗާޖު، ޓޫރިސްޓުންގެ އަތުން ނަގަނީ ޑޮލަރުންނެވެ. 

ޑޮލަރުން އެ ފައިސާ ނެގުމަށް ފަހު، މުވައްޒަފުންނަށް ދިވެހި ރުފިޔާއިން އެ ފައިސާ ދޭތީވެ ބައެއް ފަރާތްތަކުން މީގެ ކުރިން ކަންބޮޑުވުން ފާޅުކޮށްފައިވެ އެވެ. އެ ކަންބޮޑުވުންތައް ބޮޑުވީ، ރިސޯޓުތަކުން އެމްއެމްއޭއަށް ވަކި އަދަދަކަށް ޑޮލަރު މާރު ކުރަން ލާޒިމް ކުރާ ގޮތަށް ހެދި ފަހުންނެވެ. މީގެ ކުރިން %20 މާރުކުރާ ގޮތަށް އޮތް އޮތުން ބަދަލުކޮށް މިހާރު ނިންމާފައިވަނީ ރިސޯޓުތަކަށް ލިބޭ އާމްދަނީގެ %40 ބޭންކުތަކަށް މާރުކުރަންޖެހޭ ގޮތަށެވެ.