މަހާތިރުގެ އޮފީހުން ނެރުނު ބަޔާނެއްގައި ބުނި ގޮތުގައި، އާންމު ސިއްހަތަށް ވަކާލާތުކުރެއްވި ސިތީ ހަސްމާ އަވަހާރަވީ ކުއަލަލަމްޕޫރުގައި ހުންނަ ނޭޝަނަލް ހާޓް އިންސްޓިޓިއުޓްގައި ފަރުވާ ހޯއްދަވަމުން ދަނިކޮށެވެ.
ސިތީ ހަސްމާގެ މައްޗަށް ދައުލަތުގެ އެންމެ މަތީ އިއްޒަތުގައި ކަށުނަމާދު ކުރުމަށް ހަމަޖެހިފައިވާ ކަމަށް މެލޭޝިއާގެ ބޮޑުވަޒީރު އަންވަރު އިބްރާހީމް ވަނީ އިއުލާންކުރައްވާފަ އެވެ. އަންވަރު ނެރުއްވި ބަޔާނެއްގައި ވިދާޅުވި ގޮތުގައި، މުޅި ގައުމުން ވެސް އެކަމަނާގެ މައިވަންތަކަމުގެ ސިފަތައް ހަނދާންކޮށް، ގައުމަށް ކޮށްދެއްވި ހިދުމަތްތަކުގެ އަގުވަޒަންކުރާނެ އެވެ.
ޑޮކްޓަރެއް ކަމަށްވާ ސިތީ ހަސްމާއަކީ މަހާތިރުގެ އުފަން ސަރަހައްދު ކަމަށްވާ ކެދާގައި މެޑިކަލް އޮފިސަރެއްގެ މަގާމަށް އައްޔަންކުރި ފުރަތަމަ އަންހެން ބޭފުޅާ އެވެ. ފަހުން އޭނާގެ މަގާމުގެ ބޭނުން ހިއްޕަވައިގެން، މައިންގެ ސިއްހަތަށާއި އާއިލާ ރޭވުމަށާއި އެހެނިހެން އިޖުތިމާއީ ކަންކަމަށް ވަކާލާތުކުރެއްވި އެވެ.
މަހާތިރުގެ ސިޔާސީ ހަރުކަށި ސިފަތަކާ ހިލާފަށް، ސިތީ ހަސްމާއަކީ ވަރަށް މަޑުމައިތިރި އަދި މަޖާ މިޒާޖެއްގެ ބޭފުޅެއްގެ ގޮތުގައި ފާހަގަކޮށްލެވެ އެވެ.
މަހާތީރާއި ހަސްމާ އަށް 7 ބޭފުޅުން ލިބިވަޑައިގެންފައިވެ އެވެ. އެ ދެ ބޭފުޅުން ކައިވެނި ބައްލަވައިގަތީ 1956 ގަ އެވެ.
