އެ މިނިސްޓްރީން ނެރުނު ބަޔާނެއްގައި ބުނީ ދިވެހިރާއްޖޭގައި ނުރައްކާތެރި ކެމިކަލް ވިއްކާފަރާތްތަކުން އެކެމިކަލްތައް ވިއްކުމަށްޓަކައި "ކެމިކަލް ވިއްކުމުގެ ހުއްދަ" ނެންގުމަށާއި އަދި ނުރައްކާތެރި ކެމިކަލް ވިއްކުމަށްޓަކައި އެ ކެމިކަލްތައް ސްޓޯރ ކުރާ ނުވަތަ ބަހައްޓާ ތަންތަން މަކުޑި ޕޯޓަލްގައި ރެޖިސްޓާ ކުރުމަށް ދެވިފައިވާ މުއްދަތު މިހާރު ހަމަވެފައިވާކަމަށެވެ.
އެހެންނަމަވެސް އެކަމަށް ދިން މުއްދަތުގެ ތެރޭގައި ކެމިކަލް ވިއްކާ ފިހާރަތައް ރަޖިސްޓްރީކުރުމާއެކު ހުއްދަ ހޯދުމަށް އެދިލައްވާފައިވާ ފަރާތްތަކުގެ އަދަދު ނިސްބަތުން މަދުކަން ފާހަގަކުރެވިފައިވާކަަމަށް ޑިފެންސް މިނިސްޓްރީން ބުނެ އެވެ.
ދިވެހިރާއްޖޭގައި ނުރައްކާތެރި ކެމިކަލް ވިއްކާ ފަރާތްތަކުން، "ކެމިކަލް ވިއްކުމުގެ ހުއްދަ" ނެންގެވުމަށާއި، އެ ކެމިކަލްތައް ވިއްކުމަށްޓަކައި ސްޓޯރ ކުރާ ނުވަތަ ބަހައްޓާ ތަންތަން މަކުޑި ޕޯޓަލްގައި ރެޖިސްޓަރ ކުރުމަށް ދެވިފައިވާ މުއްދަތަށް މިއަދުން ފެށިގެން 1 މަސް ދުވަސް އިތުރު ކޮށްފައިވާކަަމަށް ޑިފެންސް މިނިސްޓްރީން ބުނެ އެވެ.
މިމުއްދަތުގެ ތެރޭގައި ރަޖިސްޓަރީ ނުކޮށް ކެމިކަލް ވިއްކަމުންގެންދާ ފަރާތްތަކާއިމެދު ނުރައްކާތެރި ކެމިކަލާއިބެހޭ ޤަވާޢިދު ގެ ދަށުން ފިޔަވަޅު އަޅައި އެފަރާތްތަކަށް ނުރައްކާތެރި ކެމިކަލް ރާއްޖެ އެތެރެކުރުމުގެ ހުއްދަ އިތުރަށް ދެވެން ނޯންނާނެ ކަމަށް ޑިފެނެސް މިނިސްޓްރީން ބުނެ އެވެ.
