ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން ކްރޮސްރޯޑްސް މޯލްޑިވްސްގައި ރޭ ބޭއްވި "ވޯލްޑް ޓްރެވަލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ ސެރެމަނީ 2026" ގައި ވީއައިއޭގެ ފަރާތުން މި އެވޯޑާ ހަވާލުވެވަޑައިގަތީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުހައްމަދެވެ.
މިއީ އިންޑިއަން އޯޝަންގެ ލީޑިން އެއާޕޯޓުގެ އެވޯޑް ވީއައިއޭ އިން ކާމިޔާބު ކުރި 13 ވަނަ ފަހަރެވެ.
މިއަހަރުގެ މި ކެޓަގަރީގައި ވީއައިއޭއާ ވާދަކޮށްފައިވަނީ ސަރަހައްދީ ބޮޑެތި އެއާޕޯޓްތަކާ އެވެ. އޭގެ ތެރޭގައި މަޑަގަސްކަރައިގެ އިވާޓޯ އިންޓަރނޭޝަނަލް އެއާޕޯޓާއި، ރީޔޫނިއަންގެ ރޯލަންޑް ގަރޯސް އެއާޕޯޓުގެ އިތުރުން، ސީޝެލްސް އިންޓަރނޭޝަނަލް އެއާރޕޯޓާއި މޮރިޝަސްގެ ސަރ ސީވޫސަގުރ ރާމްގޫލަމް އިންޓަރނޭޝަނަލް އެއާޕޯޓް ހިމެނެ އެވެ.
އެމްއޭސީއެލް އިން ހިންގަމުން އަންނަ ވީއައިއޭ އަށް މި އެވޯޑު ލިބުމަކީ، އެއާރޕޯޓުގެ އޮޕަރޭޝަންތަކާއި ދަތުރުވެރިންނަށް ފޯރުކޮށްދޭ ހިދުމަތްތައް ދެމެހެއްޓެނިވި ގޮތެއްގައި ކުރިއަރަމުން އަންނަކަމުގެ އަލިގަދަ ހެއްކެކެވެ.
އެމްއޭސީއެލް އިން ބުނީ، މިއީ ރާއްޖެއަށް ޒިޔާރަތްކުރާ ފަތުރުވެރިންނަށާއި އެންމެހައި ދަތުރުވެރިންނަށް އެންމެ މަތީ ފެންވަރުގެ ހިދުމަތެއް ފޯރުކޮށްދިނުމަށް ކުރަމުންދާ އިހުލާސްތެރި މަސައްކަތްތަކަށާއި، ގައުމީ ފަތުރުވެރިކަމުގެ ސިނާއަތަށް ލިބުނު ވަރަށް ބޮޑު ފަޚުރެއްކަމަށެވެ.
މި ކާމިޔާބީ ފާހަގަކުރައްވަމުން އެމްއޭސީއެލްގެ މެނޭޖިން ޑިރެކްޓަރު އިބްރާހީމް ޝަރީފް މުހައްމަދު ވިދާޅުވީ، މިއީ މުވައްޒަފުން ކުރި ބުރަ މަސައްކަތާއި، ވީއައިއޭގެ ތަރައްގީއަށް ގެންނަމުންދާ ހެޔޮ ބަދަލުތަކުގެ އިތުރުން ޕާޓްނަރުންގެ ފަރާތުން ލިބޭ އަގުހުރި އެއްބާރުލުމުގެ ނަތީޖާ ކަމަށެވެ.
ވީއައިއޭގެ އުމްރާނީ ތަރައްގީއާއި ހިދުމަތްތައް ފުޅާކުރުމުގެ މަސައްކަތްތައް މެދުކެނޑުމެއްނެތި ކުރިއަށްދާއިރު، ދަތުރުވެރިންގެ ތަޖުރިބާ އިތުރަށް ފުރިހަމަކުރުމަށްޓަކައި ޓާމިނަލްގެ އެކި ސަރަހައްދުތަކަށް ޒަމާނީ އައު ވަސީލަތްތަކާއި ހިދުމަތްތައް އަންނަނީ އިތުރުކުރެވެމުންނެވެ.
މިގޮތުން ގެނެވޭ ހެޔޮ ބަދަލުތަކާއެކު، އެއާޕޯޓުގެ އޮޕަރޭޝަންތައް އިތުރަށް ހަރުދަނާވެ، އެއާރޕޯޓުން ހިދުމަތް ހޯދާ ކޮންމެ ދަތުރުވެރިއަކަށްވެސް ލުއިފަސޭހަ އަދި ހިތްފަސޭހަ މާހައުލެއް ކަށަވަރުވެގެންދާނެ ކަމަށް އެމްއޭސީއެލް އިން ބުނެފައިވެ އެވެ.
މިއަހަރުގެ ގާލާ ހަރަކާތުގައި ދުނިޔޭގެ 40 އަށްވުރެ ގިނަ ޤައުމުން ފަތުރުވެރިކަމުގެ ދާއިރާގެ އިސްފަރާތްތަކުން ވަނީ ބައިވެރިވެފައެވެ. އޭގެތެރޭގައި ޓޫރިސްޓު ބޯޑާއި، ހޮޓާތަކާއި، ރިސޯޓުތަކުގެ އިތުރުން އެއަރލައިންތަކާއި ފަތުރުވެރިކަމުގެ މީޑިއާތައް ހިމެނެއެވެ.
މިހަފްލާ ޝަރަފުވެރިކޮށްދެއްވީ ފަތުރުވެރިކަމާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީންއެވެ.
ވޯލްޑް ޓްރެވެލް އެވޯޑްސްއަކީ 1993 ވަނަ އަހަރުން ފެށިގެން ސިލްސިލާކޮށް ބާއްވަމުން އަންނަ ދުނިޔޭގެ ފަތުރުވެރިކަމާއި ދަތުރުފަތުރުގެ ސިނާއާތުގައި ދެމުން އަންނަ އެންމެ ޝަރަފުވެރި އެވޯޑެވެ.
