މި ދަތުރުގައި މޭޔަރު އާޒިމާއި އެކު މި ފޯރަމްގައި ވިލިމާލެ ދާއިރާގެ ކައުންސިލަރު މުހައްމަދު ސަމާހް ވެސް ބައިވެރިވެ އެވެ. މި ފޯރަމް ކުރިއަށްދާނީ މިމަހުގެ 29 އިން ފެށިގެން އޮކްޓޫބަރު މަހުގެ 1 ވަނަ ދުވަހުގެ ނިޔަލަށް އިކުއެޑޯގެ ވެރިރަށް ކީޓޯގައެވެ.

ދުނިޔޭގެ އެކި ކަންކޮޅުތަކުގެ މޭޔަރުންނާއި ލޯކަލް ގަވާމަންޓްތަކުގެ އިސްވެރިން ބައިވެރިވާ މި ފޯރަމަކީ ސިޓީތަކުގެ ތަރައްޤީއާ ގުޅޭ މުހިންމު ކަންކަމަށް މަޝްވަރާކުރުމަށް ބާއްވާ ބައްދަލުވުމެކެވެ. އެގޮތުން، ދެމެހެއްޓެނިވި ގޮތެއްގައި ސިޓީތައް ތަރައްގީކުރުމާއި، ކާރިސާތަކަށް ތައްޔާރުވެފައިވާ ރައްކާތެރި ސިޓީތަކެއް ބިނާކުރުމަށް ބޭނުންވާ މާލީ އެހީތެރިކަން ހޯދުމުގެ އިތުރުން، ދެމެހެއްޓެނިވި ތަރައްގީގެ ލަނޑުދަނޑިތައް (އެސްޑީޖީސް) ލޯކަލް ފެންވަރުގައި ތަންފީޒުކުރުމާ ގުޅޭގޮތުން ފުޅާ ދާއިރާއެއްގައި މި ފޯރަމްގައި މަޝްވަރާކުރެވިގެންދާނެކަމަށް މާލޭ ސިޓީ ކައުންސިލުން ބުނެ އެވެ. 

މި ދަތުރުފުޅުގެ ސަބަބުން މާލެ ސިޓީގެ ތަރައްޤީއަށާއި، ދިމާވާ ގޮންޖެހުންތަކުން އަރައިގަތުމަށް ބައިނަލްއަޤްވާމީ ފެންވަރުގައި އެހެން ސިޓީތަކާއެކުގައި ގުޅުން ބަދަހިވެ، މުހިންމު ތަޖުރިބާތަކެއް ލިބިގެންދާނެ ކަމަށް ބެލެވޭކަމަށްވެސް މާލޭ ސިޓީ ކައުންސިލުން ބުނެ އެވެ. 

މި ދަތުރުގައި މާލެ ސިޓީ ކައުންސިލްގެ ސެކްރެޓަރީ ޖެނެރަލް އަބްދުލް މުހައިމިން ނަސީރު ވެސް ބައިވެރިވާކަމަށް ކައުންސިލުން ބުނެ އެވެ.