2023 ޖޫން 28 ގައި ހިނގި މި ހާދިސާއާ ގުޅިގެން ކުޅުދުއްފުށީ މެޖިސްޓްރޭޓް ކޯޓުގެ އިސް މެޖިސްޓްރޭޓް މުޙައްމަދު އިސްމާޢީލް ކުރެއްވި މި ހުކުމަކީ، "އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުން" ކުށުގެ ދައުވާއާ ގުޅިގެން އިއްވި ހުކުމެކެވެ.
ޢަބްދުލްހާދީ ވަނީ އިތުރު މީހަކާއެކު ގެއަކަށް ވަދެ، މަކިޓާ ބްރޭންޑްގެ ގްރޭންޑަރަކާއި ބުރުމާއެއް ވަގަށް ނެގުމަށްފަހު، އެ ތަކެތި 500 ރުފިޔާއަށް ވިއްކާލައި، ފައިސާ ދެ މީހުންގެ މެދުގައި އެއްވަރަކަށް ބަހާލާފަ އެވެ.
ފުރަތަމަ ދައުވާއަށް އިންކާރުކުރި ނަމަވެސް، ޝަރީޢަތުގެ ފަހު މަރުޙަލާގައި އޭނާ ވަނީ ސިޓީއަކުން އަމިއްލައަށް ކުށަށް އެއްބަސްވެފަ އެވެ. މި ކުށުގެ އަސާސީ އަދަބަކީ 9 މަހާއި 18 ދުވަހުގެ ޖަލު އަދަބެކެވެ. ފާއިތުވި 5 އަހަރު ތެރޭގައި ޖިނާއީ އެހެން ކުށްތަކެއް ސާބިތުވެފައިވާތީ އަދަބުގެ ދަރަޖަ 3 ދަރަޖަ މަތިކުރެވުނު ނަމަވެސް، ކުށަށް އެއްބަސް ވުމުން 2 ދަރަޖަ ދަށްކޮށް، ކޯޓުން ވަނީ 1 އަހަރުގެ ޖަލު އަދަބެއް ކަނޑައަޅާފަ އެވެ.
