މި ބައްދަލުވުމުގައި ސްޓޭޓް އިލެކްޓްރިކް ކޮމްޕެނީ (ސްޓެލްކޯ)، މާލެ ވޯޓަރ އެންޑް ސެވަރޭޖް ކޮމްޕެނީ (އެމްޑަބްލިޔުއެސްސީ) އަދި ފެނަކަ ކޯޕަރޭޝަންގެ މެނޭޖިންގ ޑިރެކްޓަރުންގެ އިތުރުން، ތިމާވެއްޓާ ބެހޭ ވުޒާރާއާއި ކަމާގުޅުންހުރި އެކި އިދާރާތަކުގެ އިސްވެރިން ބައިވެރިވެވަޑައިގެންނެވި އެވެ.
މި ބައްދަލުވުމުގެ މައިގަނޑު މަގުސަދަކީ ޔުޓިލިޓީ ދާއިރާއިން ރައްޔިތުންނަށް ދެމުންގެންދާ ހިދުމަތްތައް އިތުރަށް ހަރުދަނާކޮށް، ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތިން ހިދުމަތްތަކުގެ ފެންވަރު މަތިކުރުމަށްޓަކައި އަޅަންޖެހޭ ފިޔަވަޅުތައް ދެނެގަނެ އެކަންކަން ތަންފީޒުކުރުމަށް މަޝްވަރާކުރުމެވެ.
ބައްދަލުވުމުގައި މިނިސްޓަރު ވަނީ ރައްޔިތުންނަށް ލުއި ފަސޭހަ އަދި އިތުބާރު ހުރި ގޮތެއްގައި އަސާސީ ހިދުމަތްތައް ފޯރުކޮށް ދިނުމަށް ސަރުކާރުން ހާއްސަ އިސްކަމެއް ދެއްވާކަން ފާހަގަކުރައްވައި، ކަމާ ގުޅޭ އެންމެހައި މުއައްސަސާތައް ގުޅިގެން މަސައްކަތްކުރުމުގެ މުހިންމުކަން ފާހަގަ ކުރައްވައިފި އެވެ.
ރާއްޖޭގައި ކަރަންޓާއި ފެނާއި ނަރުދަމާގެ ހިދުމަތް ދެމުން އަންނަ ކުންފުނިތަކުގެ ތެރެއިން ފެނަކަ މިހާރު އޮތީ އުވާލަން ނިންމައި، ސްޓެލްކޯގެ ދަށަށް ބަދަލުކޮށްފަ އެވެ. އެ ކުންފުނިން އެ ހިދުމަތް ދެމުން އަންނަ ތަންތަނުގެ ތެރެއިން ރާއްޖޭގެ އެންމެ ދެކުނު އައްޑު އާއި ފުވައްމުލަކުގެ ފެނާއި ނަރުދަމާގެ ހިދުމަތް އެމްޑަބްލިއުއެސްސީގެ ދަށަށް ބަދަލު ކުރުމާ ގުޅޭ އެއްބަސްވުމެއްގައި އާދީއްތަ ދުވަހު ސޮއި ވެސް ކޮށްފައިވެ އެވެ.
