ދުވަސްތަކަށްފަހު ބޭއްވި މި މައްސަލާގެ އަޑުއެހުމުގައި ދައުލަތުން ހެކި ބަސްދޭން ފުރުސަތު ނުދޭން ހުށައަޅާފައިވަނީ ޔާމިންގެ ފަރާތުން ހުށައެޅި ތިން ހެއްކަކަށެވެ. ދައުލަތުން ބަލައިނުގަތުމަށް އެދުނު ހެކިތަކަކީ މާލޭގެ ކުރީގެ ޑެޕިއުޓީ މޭޔަރު އަދި މީހާރުގެ ޔޫތް މިނިސްޓްރީގެ ޑެޕިއުޓީ މިނިސްޓަރު އަހުމަދު ނަރީޝް ވިލިމާލެ ދާއިރާގެ މަޖިލިސް މެމްބަރު މުހައްމަދު އިސްމާއީލް އަދި ހުޅުދޫ ދާއިރާގެ މަޖިލިސް މެންބަރު މުހައްމަދު ޝާހިދެވެ. މީގެއިތުރުން އަބްދުﷲ ރަޝީދު ކިޔާ މީހެއްގެ ހެކިބަހާއި ޑޮލަރު މާރުކުރިކަން ބަޔާންކޮށްދޭ ލިޔުމެއްކަމަށް ބުނެ ޔާމީން ހުށައެޅުއްވި ލިޔުންވެސް ބަލައި ނުގަތުމަށް ދައުލަތުން ވަނީ ކޯޓުގައި އެދިފައެވެ.
އެ ހެކިތައް ބަލައި ނުގަތުމަށް ސަބަބެއްގެ ގޮތުގައި ދައުލަތުން ބުނީ އެ މައްސަލައިގެ ތަހުގީގު މަރުހަލާގައި ޔާމީން ހަނު ހުންނެވުމަށްފަހު އެ މަރުހަލާގައި ހާމަނުކުރާ ހެކިތަކަށް ޝަރީއަތުގައި ފުރުސަތު ދެވިގެންނުވާނެތީކަމަށެވެ.
ނަރީޝް ހެއްކެއްގެ ގޮތުގައި ބަލައި ނަގުތުމަށް ދައުކަތުން އެދުނުއިރު މި މައްސަލަ ކްރިމިނަލް ކޯޓުގައި ކުރިޔަށް ދިޔައިރު ނަރީޝް ވަނީ ރައީސް ޔާމީނާއި އެއްކޮޅަށް ހެކި ބަސްދީފަ އެވެ. އޭރު ހެކިބަސް ދެމުން ނަރީޝް ބުނީ ވ. އާރަށް ކުއްޔަށް ދިން މައްސަލާގައި ޔާމީންގެ އެކައުންޓަސް ޖަމާވި އެއްމިލިއަން ޑޮލަރަކީ ރައްޔިތުންގެ މަޖިލީހުގެ ފެލިދޫ ދާއިރާގެ ކުރީގެ މެމްބަރު ޔޫސުފް ނައީމްގެ އަތުން ގަތް ޑޮލަރުކަމަށެވެ. އަދި އަދަށްވާ ދިވެހި ފައިސާ ގުނީ އަމިއްލަ އަތުންކަމަށްވެސް ނަރީޝް ވަނީ ކޯޓުގައި ބުނެފައެވެ. އެހެންނަމަވެސް އޭރުވެސް ވަނީ އޭނާގެ ހެކިބަހާއި މެދު ސުވާލުތައް އުފެދިފަ އެވެ.
ވ، އާރަށް ކުއްޔަށް ދިނުމުގައި ޔާމީންގެ މައްޗަށް ދައުވާ ކުރަނީ ރިޝްވަތުގެ ގޮތުގައި އެއް މިލިއަން ޑޮލަރު ގަބޫލުކޮށް، އެ ފައިސާ ލޯންޑާކުރި ކަމުގެ ތުހުމަތުގައެވެ. އަދި މި މައްސަލާގައި މެމްބަރު ޔޫސުފް ނައީމްގެ މައްޗަށް ވެސް ދައުވާކުރެ އެވެ.
ވ. އާރަށް ކުއްޔަށްދިން މައްސަލާގައި ރިޝްވަތު ގަބޫލުކޮށް މަނީ ލޯންޑާ ކުރިކަން ސާބިތުވެ ކްރިމިނަލްކޯޓުން ޔާމީންގެ މައްޗަށް 11 އަހަރުގެ ޖަލު ހުކުމެއް އިއްވި އެވެ. އެހެންނަމަވެސް ހައިކޯޓުން ވަނީ އެ ހުކުމް ފަހުން ބާތިލުކޮށްފަ އެވެ.
