މި ހާދިސާ ހިނގާފައިވަނީ ބޯކޮށް ވާރޭވެހި ބެންކޮކްގެ ބޮޑު ސަރަހައްދެއްގައި ފެންބޮޑުވެ، ކާރިސާގެ ހާލަތު އިއުލާނުކޮށްފައި ވަނިކޮށެވެ.
ފުލުހުން ހާމަކުރި ގޮތުގައި، އެ މީހާ ހައްޔަރުކޮށްފައިވަނީ ބެންކޮކްގެ ނިއު ޕެޗަބުރީ މަގުގައި ފެންބޮޑުވެފައި ވަނިކޮށް ބާރު ސްޕީޑުގައި ޖެޓްސްކީ ދުއްވައި، އާންމުންނަށް އުނދަގޫވާ ގޮތަށް އަމަލުކުރުމުގެ ތުހުމަތުގައެވެ. އޭނާ ޖެޓްސްކީ ދުއްވާ މަންޒަރު ފެންނަ ވީޑިއޯތައް ސޯޝަލް މީޑިއާގައި ދައުރުވުމާ އެކު ގިނަ ބައެއްގެ ފާޑުކިޔުން ވަނީ އަމާޒުވެފަ އެވެ.
ފުލުހުންގެ ތަހުގީގުގައި އެ މީހާ ބުނެފައިވަނީ، މިއީ ސޯޝަލް މީޑިއާ ސްޓަންޓެއްގެ ގޮތުގައި ބިދޭސީ ރަހުމަތްތެރިއެއްގެ އެދުމުގެ މަތިން މީހުން ހެއްވާލުމުގެ މަގްސަދުގައި ކުރި ކަމެއް ކަމަށެވެ. އަދި މިފަދަ ހާލަތެއްގައި އެގޮތަށް ކަންތައް ކުރުމަކީ އާންމު އުސޫލުތަކާ ހިލާފު ކަމެއްކަން އޭނާއަށް ނޭނގޭ ކަމަށް ވެސް އޭނާ ބުނެފައި ވެއެވެ.
މި މައްސަލައިގައި އޭނާގެ މައްޗަށް އާންމުންނަށް އުނދަގޫ ކުރުމުގެ ދައުވާ އުފުލައި، ކޯޓުން ވަނީ 15 ދުވަހުގެ ސަސްޕެންޑެޑް ޖަލު ހުކުމަކާއި ޖޫރިމަނާއެއް ކަނޑައަޅާފައެވެ. މީގެ އިތުރުން އޭނާ ދުއްވި ޖެޓްސްކީ ދައުލަތަށް ނެގުމަށް ވެސް ކަމާބެހޭ ފަރާތްތަކުން ވަނީ މަސައްކަތް ކޮށްފަ އެވެ.
ފެންބޮޑުވުމުގެ ސަބަބުން އެތައް ހާސް ރައްޔިތުންނަކަށް ދަތިތަކާ ކުރިމަތިވެފައިވާ ދަނޑިވަޅެއްގައި މިފަދަ ނުރައްކާތެރި އަދި ޒިންމާދާރުކަން ކުޑަ އަމަލުތައް ނުހިންގުމަށް ތައިލެންޑުގެ ފުލުހުން ވަނީ އާންމުންނަށް އިލްތިމާސްކޮށްފަ އެވެ.
