ރާއްޖެއަށް މިއަދު ވެގެން މި އުޅެނީ މިހެން ބާވަ އެވެ.؟
ދައުލަތެއް ހިންގުމުގައި އެންމެ މުހިންމު އެއް އަސާސަކީ ދެފުށް ފެންނަ، ހާމަކަން ބޮޑު ނިޒާމެއް އޮތުމެވެ. އިސްލާމީ ޝަރީއަތުގައި ވެސް ވެރިކަން ހިންގުމާއި، އާންމު މުދަލާއި މާލިއްޔަތު ބެލެހެއްޓުމުގައި އަމާނާތްތެރިކަމާއި އަދުލުވެރިކަން އިސްކުރުމަށް ވަނީ ނުހަނު ބާރުއަޅުއްވާފަ އެވެ.
ނަމަވެސް، މިއަދު ރާއްޖޭގެ ހާލަތަށް ބަލާއިރު، ދައުލަތުގެ ކަންކަން ދެފުށް ފެންނަ ގޮތަށް ހިންގުމަށް ސިޔާސީ ހާދިމުން އެއްގޮތަކަށް ވެސް ބޭނުން ނުވާކަން އެމީހުން ބަހާއި އަމަލުން ފާހަގަ ކުރެވެ އެވެ. މިކަމުގެ ސަބަބުން އުފެދޭ އެންމެ ބޮޑު ސުވާލަކީ، މި މައްސަލައަށް ދާއިމީ ހައްލެއް ނުގެނެސް ސިޔާސީ ހާދިމް ހުސް ވާހަކަ ދައްކާލަ ދައްކާލަ މި ތިބެނީ ކީއްވެތޯ އެވެ.؟ އެ ގޮތައް އެ ތިބެނީ ކޮންމެ ފަސް އަހަރަކުން ދައުލަތުގެ މުއްސަނދިކަމުން އެ ފަދަ ހާމަކަން ކުޑަ ގޮތެއްގައި ކަންކަންކޮށްގެން ލިބޭ "މާލީ މަންފާ" ހޯދުމުގެ ބޭނުމުގައިތޯ އުފެދޭ ސުވާލެކެވެ. ރައްޔިތުންނަށް "ލިޔެކިޔުން ސިއްރު" ކޮށްފައި ހުރި މަޝްރޫއުތަކުން ދެއްކި ސިޔާސީ ހަގީގަތަކީ މީ ނޫންތޯ އެވެ.!؟
ސަރުކާރުތަކުން ކަންކަން ކުރުމުގައި ދެފުށްފެންނަގޮތައް ކަންކަން ނުކުރާ މައްސަލާގައި ކުރީގެ އިކޮނޮމިކް މިނިސްޓަރު އަދި އިގުތިސާދީ ތަޖުރިބާކާރު އަހުމަދު މުހައްމަދު (އަންޑޭ) ވިދާޅުވީ ހާމަކަން ކުޑަގޮތްގޮތައް ދެފުށްނުފެންނަގޮތަށް ހިންގާ ކަންކަން ހުއްޓުވަންޖެހޭނެ ކަމަށާއި އެ ގޮތައް އެކަން ކުރުމަށް ގާނޫނު އަސާސީން ވެސް ޖާގަ ނުލިބޭ ކަމަށެވެ.
ޑިމޮކްރަސީއަކީ އަބަދު ވެސް އެއަށް ހޭނުމާއި އީޖާދީގޮތްތަކާއި އާ ކަންތައްތައް އޭގައި ހިމެނޭ އަދި އެންމެންގެ އެއްބާރުލުމާއި ބައިވެރިވުން ބޭނުންވާ އެއްޗެކެވެ. ގިނަ ބައެއްގެ މަޝްވަރާ އާއި ބައިވެރިވުން ލިބިގެން އަދި ވަކިން ހާއްސަކޮށް ގޮތް ނިންމުމުގައި މަންދޫބުން މެދުވެރި ނުކޮށް "ސީދާ ރައްޔިތުން"ގެ ބައިވެރިވުން ހޯދަން މަޖުބޫރުވާ ފަދަ ގާނޫނީ އިސްލާހުތަކެއްގައި ކުލަ ޖެހިއްޖެ ނަމަ ރާއްޖޭގެ ހިންގުމުގެ އޮނިގަނޑުން މިހާރު ނު ފެންނަ "ޓްރާންސްޕޭރެންސީ" ފެނިގެން ދާނެ އެވެ.
ދައުލަތުގެ ހިންގުމުގެ އޮނިގަނޑުގައި "ހާމަކަން" ނެތުމުން އިވޭ އަޑުތަކަކީ ކްރޮސްރޯޑްސް ތަރައްގީ ކުރި މަޝްރޫއުއަށް އެނބޫދޫފަޅު، ތައިލެންޑްގެ ސިންހާ އެސްޓޭޓަށް 50 އަހަރަށް "ކުއްޔަށް ދިން" ގޮތުގެ ވާހަކަ އެވެ. ރަސްމާލޭގެ ގާތްގަނޑަކަށް 500 ހެކްޓަރުގެ ބިން ޔޫއޭއީގެ އީގަލް ހިލްސްއަށް، 20 ބިލިއަން ޑޮލަރަށް 99 އަހަރަށް، އެ "ހިލޭ ދޫކޮށްލި" ވާހަކަ އެވެ. ފ. އަތޮޅު ސައުދީ އަރަބިއްޔާގެ ޝާހީ އާއިލާ އަކަށް 10 ހާސް ބިލިއަން ނުވަތަ 10 ބިލިއަން ޑޮލަރަށް "ވިއްކާލަން" އުޅުނު ވާހަކަ އެވެ. އިންޑިއާގެ ޖީއެމްއާރަށް ދިވެހި ވައިގެ މައި ދޮރާށި - ވީއައިއޭ ހިންގުން ހަވާލު ކުރަން އެޑްވާންސްގެ ގޮތުގައި 78 މިލިއަން ޑޮލަރުން "ކަޑު ނެގި" ވާހަކަ އެވެ.
މިއިން އެއްވެސް ފައިސާ އެއް ނުވަތަ ފައިސާފޮޗެއްގެ ދެފުށް ފެންނާނެ ސިޔާސަތަކީ ރައްޔިތުންގެ ހާދިމުން މިހާރު ކުރަން ބޭނުން ކަމެއް ނޫނެވެ. ދިވެހި ރާއްޖޭގެ މިނިވަން ކަމާއި އިސްތިގުލާލަށް ދުރު މުސްތަގުބަލުގައި ލޮޅުން އެޅިދާނެ "ބިރުވެރި" މިފަދަ ކިތަންމެ ވާހަކައެއް އަދި ވެސް ރަށުތެރެއިން އެބަ އިވެ އެވެ.
ދައުލަތް ހިންގުމުގެ ނިޒާމުގައި ދެފުށް ފެންނަ މިންވަރު ބޮޑުވި ވަރަކަށް، ސަރުކާރާއި މުއައްސަސާތަކަށް ރައްޔިތުން ކުރާ އިތުބާރު ބޮޑުވެ އެވެ. ޑިމޮކްރެޓިކް ވެށްޓެއްގައި ރައްޔިތުންނަކީ ބާރުތަކުގެ އަސްލެވެ. އެހެންކަމުން، ވެރިން ކުރާ ކަންކަމުގެ މައުލޫމާތު އެނގި، އެކަންކަމާ މެދު ސުވާލުކޮށް ޖަވާބުދާރީ ކުރުވުމުގެ ފުރުސަތު އޮތުމަކީ ރައްޔިތުންނާއި ސަރުކާރާ ދެމެދު އޮންނަ ގުޅުން ބަދަހިކޮށްދޭ މައިގަނޑު ސަބަބަކަށްވާނެ އެވެ. އިތުބާރު އޮތް ތަނެއްގައި އިޖުތިމާއީ ސުލްހަވެރިކަމާއި އިގްތިސޯދީ މިނިވަންކަން ދެމިއޮވެ އެވެ.
ނަމަވެސް، ހާމަކަން ނެތުމުގެ ނާޖާއިޒު ފައިދާ ނަގައި، ސިޔާސީ ބައެއް ފަރާތްތަކުން ދައުލަތަށް ދޭ މާލީ ގެއްލުން އިންތިހާއަށް ބޮޑުވެ އެވެ. ދައުލަތުގެ ކުންފުނިތަކާއި، ބޮޑެތި މަޝްރޫއުތަކުގެ ތެރެއިން ނާޖާއިޒު މަންފާ ހޯދުމާއި، ބޭކާރު ހަރަދުތައް ކުރުމުގެ ސަބަބުން ދައުލަތް ދަރަނިވެރިވެ، އޭގެ ބުރަ އުފުލަން ޖެހެނީ ނިކަމެތި ރައްޔިތުންނަށެވެ.
ސިޔާސީ ބާރުވެރިކަން ދެމެހެއްޓުމަށްޓަކައި ސިއްރު އެއްބަސްވުންތައް ހަދައިގެން ނުހައްގު މުއްސަދިކަމުން ހޯދާ ދައުލަތުގެ ފައިސާ ނަހަމަ ގޮތުގައި ބޭނުންކުރުމަކީ މިހާރު ސިޔާސީ ލީޑަރުން "ފެޝަން" އެއް ކަމަށް ބުނާ އަޑު އަންނަނީ ގިނަވަމުންނެވެ. މިކަން އެދޭ ވަރުން ދެފުށް ފެންނަގޮތައް ކަންކަން ކުރަން ބޭނުން ވެސް ނުވަނީ އެވެ. މިކަމުގެ ގެއްލުން ހައްދެއް ނެތް މިންވަރަށް މިދަނީ ފެންނަމުން ނެވެ.
ދަންނަ އެވެ. ސަރުކާރުގެ ނިންމުންތަކާއި މަޝްރޫއުތަކުގެ މައުލޫމާތު ސިއްރު ކުރެވޭ ނަމަ، ކޮރަޕްޝަނާއި ހިޔާނާތަށް މަގުފަހިވެ އެވެ. އޭގެ ނަތީޖާއެއްގެ ގޮތުން ގައުމުގެ އިގްތިސާދު އިނދަޖެހި، ބޭރުގެ އިންވެސްޓަރުންގެ އިތުބާރު ގެއްލި، ގައުމުގެ ތަރައްގީގެ ދުވެލި މަޑުޖެހިގެންދެ އެވެ. އަދި ހަމައެއާއެކު، ގާނޫނުގެ ވެރިކަން ބަލިކަށިވެ، މުޖުތަމައުގައި ބޭއިންސާފު އާންމުވެގެންދެ އެވެ.
މިކަމަށް "އެދޭ ރާއްޖެ" ހަރަކާތުން ގޮވާލާ ހައްލުތަކަކީ:
މި މި ފަދަ ބަދަލު ތަކެއް އަވަސް މުސްތަގުބަލެއްގައި ރާއްޖެ އަށް ނުގެނެވިއްޖެ ނަމަ، ދިވެހިންގެ މިނިވަންކަމާއި އިސްތިގުލާލަށް އޮތް ބޮޑު ނުރައްކަލުގެ ރަނގަބީލުގެ އަޑު މިހާރު ވެސް ރަށު ތެރެއިން އަންނަނީ އިވެމުން ނެވެ. ވޯޓުން ހޮވިގެން ސަރުކާރު ހިންގަން ހަވާލުވާ މީހުން/މީހާ ވޯޓުން ބޭރުކުރުމުގެ ބާރު ރައްޔިތުންނަށް ނުލިބިދާ ކޮންމެ ދުވަހަކީ ގައުމުގެ މުސްތަގުބަލު "ސިޔާސީ ވަގުންގެ" އަޅުވެތިކަމުގެ ތެރެއަށް ހުށަހެޅިގެންދާ ފަނާކުރުވަނިވި އަމަލަކަށް ނުވާނެ ބާވަ އެވެ.؟!
