ސައިންސްވެރިންގެ މި ހޯދުމާއެކު، ބަރުދަން ލުއިކުރުމަށްފަހު އެކަން ދެމެހެއްޓުމަށް ގިނަ ބަޔަކު ކުރާ ހިތްވަރަށް އެދެވޭ ނަތީޖާއެއް ނުލިބި އަނބުރާ ފަލަވާ ސަބަބު ސައިންސްގެ އަލީގައި މިވަނީ ސާފުވެފަ އެވެ.
ދިރާސާވެރިން ހާމަކުރި ގޮތުގައި، ބަރުދަން އަނބުރާ އިތުރުވަނީ ހަށިގަނޑުގެ ސަރުބީ ސެލްތަކުގައި ހުންނަ "ބަޔޮލޮޖިކަލް މެމޮރީ" ނުވަތަ މަޢުލޫމާތު ރައްކާކުރުމުގެ ނިޒާމެއްގެ ސަބަބުންނެވެ. މި ނިޒާމު ކޮންޓްރޯލް ކުރަނީ "ޓީޖީއެފްބީ-އަސްޕްރޯސިން" ނަމަކަށް ކިޔާ ޕްރޮޓީންއަކުންނެވެ. ހަށިގަނޑުގެ ބަރުދަން ލުއިވުމަށްފަހު، މި ޕްރޮޓީންގެ ސަބަބުން ސަރުބީ ސެލްތަކުން އަލުން ކުރީގެ ބަރުދަނަށް ހަށިގަނޑު ގެންދިއުމަށް ބާރުއަޅަ އެވެ.
މިއީ ޑައެޓް ކުރުމަށްފަހު އަލުން ބަރުދަން އިތުރުވާ "ޔޯ-ޔޯ ޑައެޓިންގ" ގެ މައްސަލައަށް ދިމާވާ ބަޔޮލޮޖިކަލް ސަބަބު ސާފުވި ފުރަތަމަ ފަހަރެވެ. މި ހޯދުމުގެ ސަބަބުން، ކުރިމަގުގައި ދިގު މުއްދަތަކަށް ބަރުދަން އެއްވަރެއްގައި ހިފެހެއްޓުމަށްޓަކައި އާ ފަރުވާތަކާއި އުކުޅުތައް އީޖާދުކުރުމަށް ބޮޑު ފުރުސަތެއް ހުޅުވިގެންދާނެކަމަށް ސައިންސްވެރިން ބުނެ އެވެ.
މި އާ ހޯދުމަކީ ބަރުދަން ލުއިކުރުމަށްފަހު އަނބުރާ އިތުރުވާ މައްސަލައަށް ދާއިމީ ހައްލެއް ހޯދުމަށް ކުރެވޭ މަސައްކަތުގައި ލިބުނު މުހިންމު ކުރިއެރުމެކެވެ. ސައިންސްވެރިން އުންމީދު ކުރަނީ މި ޕްރޮޓީންގެ އަމަލުތަކަށް އަމާޒުކޮށްގެން، ދުޅަހެޔޮ ސިއްހަތެއްގައި ހަށިގަނޑު ދެމެހެއްޓުމަށް އެހީތެރިވެދޭނެ އާ މަގުތަކެއް ފެނިގެންދާނެ ކަމަށެވެ.
