އެ ގައުމުގެ މީޑިއާތަކުން ބުނީ ޓެމިލް ނާޑޫގެ ދެ ސަރަހައްދެއްގައި ހިންގި ވަކިވަކި ދެ އޮޕަރޭޝަނެއްގައި، 18 ކްރޯޑް ރުޕީސް (ގާތްގަނޑަކަށް 33 މިލިއަން ރުފިޔާ) އަށް ވުރެ ގިނަ ފައިސާގެ މަސްތުވާތަކެތި އެ ގައުމުގެ ކަމާބެހޭ އިދާރާތަކުން އަތުލައިގެންފައިވާ ކަމަށެވެ.
އޭގެ ތެރޭގައި ރާއްޖެއަށް ފޮނުވަން އުޅުނު ކަމަށް ތުހުމަތު ކުރެވޭ ހަޝިޝް އޮއިލްގެ އިތުރުން، ޗެންނާއީ އިންޓަނޭޝަނަލް އެއާޕޯޓުން ފަސިންޖަރެއްގެ އަތުން އަތުލައިގަތް ހައިޑްރޯފޮނިކް ގަންޖާ ހިމެނެ އެވެ.
މި މައްސަލައާ ގުޅިގެން ޓުޓިކޮރިންގައި ހިންގި އޮޕަރޭޝަނުގައި ހަތަރު ފިރިހެނަކު ހައްޔަރުކޮށްފައިވާ އިރު، ޗެންނާއީ އެއާޕޯޓުން މަސްތުވާތަކެތި އަތުލައިގަތް މައްސަލައިގައި އަންހެނަކު ހައްޔަރުކޮށްފައިވެ އެވެ. އެ އެންމެންނަކީ ވެސް އިންޑިއާ މީހުންނެވެ.
އިންޑިއާގެ ކޯސްޓްގާޑުން ފާހަގަކުރި ގޮތުގައި، މި އޮޕަރޭޝަނުގެ ސަބަބުން ބައިނަލްއަގުވާމީ ޑްރަގް ސިންޑިކޭޓްތަކުގެ މާލީ ނެޓްވޯކަށް ބޮޑު ހުރަހެއް އެޅިގެންދާނެ އެވެ. މީގެ ކުރިން މިދިޔަ އަހަރުގެ އޭޕްރީލް މަހުވެސް ކޯސްޓްގާޑާއި ގުޖަރާތު އޭޓީއެސް ގުޅިގެން ވަނީ ގުޖަރާތުގެ އައްސޭރިފަށުން 307.5 ކިލޯގެ މަސްތުވާތަކެތި އަތުލައިގެންފަ އެވެ.
އިންޑިއާ ސަރުކާރުން ކުރިއަށްގެންދާ ނަޝާ މުކްތު ބާރަތު އަބިޔާން (މަސްތުވާތަކެތިން ސަލާމަތްވެފައިވާ އިންޑިއާއެއް ބިނާކުރުމުގެ ކެމްޕޭން) ގެ ދަށުން، ކަނޑުމަގުން ހިންގާ މިފަދަ ކުށްތައް ހުއްޓުވުމަށް ސަލާމަތީ ފިޔަވަޅުތައް ވަނީ ވަރުގަދަކޮށްފަ އެވެ.
