އަހަރެންގެ އަޑު އިވުމާއެކު ސޯފައިން ތެދުވެގެން ބީނިޝް އައެވެ.
އެހެން އެއްވެސް މީހެއްގެ މޫނަށް ބަލައިލާނެ ހިތްވަރެއް ނުލިބުމުން އަވަސް އަވަހަށް ބީނިށް އުރާލައިގެން ކޮޓަރިއަށް ދެމިގަތީމެވެ.
ކުރިއަށް ވުރެންވެސް ފުރިހަމައަށް ބީނިޝްގެ އިސްތަށިގަނޑު 'ސްޓައިލް'ކޮށްލީމެވެ.
ބޭބީ ޕިންކް ބޫޓަށް އަރުވައިލުމުން ނުހަނު އުފަލުން ކޮޓަރީތެރޭގައި ނަށަން ފަށައިފި އެވެ.
ފިކުރެއް ހިޔާލެއް ނެތި ޖައްވުގެތެރޭގައި އުދުހޭ މިނިވަން ދޫންޏެއް ފަދައިން ބީނިޝް އުފާކުރާ މަންޒަރަކީ އަހަރެންގެ ހިތުގެ ފިނިކަމެވެ.
ނުހަނު އުފަލުން ބީނިޝްގެ 'ފަހޫ'އަށް ގޮވަމުން ކޮޓަރީން ނިކުމެއްޖެ އެވެ. އަހަރެންގެ ފޯނާއި އަތްދަބަސް ހިފައިގެން ނިކުތުމަށް ދޮރުހުޅުވާލި ވަގުތު ކުއްލިޔަކަށް ލައްވީ، މާލިކްގެ މޭމަތީގައި އެވެ.
"އައި އެމް ސޮރީ" މަޑުމަޑުން ބުނީމެވެ.
އަވަސްއަވަހަށް ބަލައިލެވުނީ އަހަރެންގެ މޭކަޕްގެ ސަބަބުން މާލިކްގެ ގަމީސް ހަރާބުވެފައިވޭތޯ އެވެ.
"މާ ޝާ ﷲ، ކައިރާ...! ތިޔަ ރީތިކަމާއި ހިތްގައިމު ކަމަށް ތައުރީފު ކުރުމަށް އަހަރެންގެ ގާބިލްކަން ތަނެއް ނުދޭ.. ޔޫ އަރ ގޯޖަސް މައި ލަވް! ވަރަށް ލޯބި.. ވަރަށް ފުރިހަމަ.." މާލިކްގެ ލޮލުގައިވާ އިޝްގީ އޮއެވަރުގައި ފީނާނެ ހަކަތައެއް މިވަގުތު އަހަރެންގެ ހިތާއި ހަށިގަނޑުގައި ނެތެވެ.
ދެ ލޯ މަރައި ތަގުޅިކޮށްލެވުނެވެ.
ލިބެމުންދިޔަ އަރާމުގައި ނޭވާލާންވެސް ހަނދާން ނެތުނީ އެވެ. މޫނާއި ކަނދުރާގެ އެތަން މިތަނުގައި ލޯބިކުރުމަށްފަހު ނިއްކުރީގައި ތުންފަތް ޖައްސައި ފިއްތާލި އެވެ.
"ތެންކިޔު" މަޑުމަޑު ވައިރޯޅިއެއް ފަދައިން އަހަރެންގެ އަޑު ދަތުރުކޮށްލި އެވެ. އޭރުވެސް ހިތުގެ ތެޅުން ހަމަޔަކަށް ނޭޅެ އެވެ.
"ފާއިތުވެގެން މި ދަނީ މާލިކްގެ ހުސްހަށިބައިކަމުގެ އެންމެ ފަހު މިނެޓްތައް... އުއްމީދުކުރަން މާލިކްއަށް ކަމުދިޔަ ވަގުތުތަކަކަށް ވާނެކަމަށް" އަހަރެން ބުނީމެވެ.
"ކާކު ބުނީ އަހަރެންނަކީ ހުސްހަށިބައި މީހެކޭ؟"
"އެހެން... ބުނީ ... އަޅުގަނޑު" އަހަރެންގެ މޭގައި އިނގިލި ޖައްސައިލާފައި ބުނީމެވެ.
"ނޫން، މެޑަމް.. އަޅުގަނޑަކީ ހުސްހަށިބައި މީހެއް ނޫން.. އެންމެ ފުރަތަމަ ކައިރާ އާއި ބައްދަލުވި ވަގުތުން ފެށިގެން އަހަންނަކީ 'މީހެއްގެ' ހައްގެއް" ދެ އަތުގެ އިނގިލިތަކުން ކޮމާކޯޅި ދައްކާލާފައި މާލިކް ބުންޏެވެ.
"މާލިކް" އަހަރެންގެ މައިބަދައިން ހީބިހިނަގައިގެން ދިޔަ ވަގުތުގައި މާލިކްގެ ނަން ދުލުން ބޭރުވި އެވެ.
"ޔޫ އަރ މައި ފޮރެވަރ، ކައިރާ"
"އޯލްވޭޒް އެންޑް ފޮރެވަރ"
މާކުރިން ރޭވި، ރޭވުމެއް ނެތެވެ. ކައިވެނީގެ ކުރިން ވެވޭ އެންމެ ފަހުގެ ވައުދުތަކެވެ.
ދެމީހުންގެ ލޮލާއި މުޅި ހަށިގަނޑު އިޝްގުގެ ވައިގައި ދަތުރު ކުރަނީ އެވެ. އަބަދަށްޓަކައި މުޅި އުމުރަށް އެކުގައިވުމަށް ވެވުނު ވައުދަކީ، ދުލުން ބޭރުކުރި އާދައިގެ ޖުމުލައެއް ނޫނެވެ. އެއީ އަހަރުމެންގެ ލޯބީގެ ބިންގާ އެވެ. މި ބިންގަލުގެ މަތީގައި ދިރިއުޅުން އާރާސްތުކުރާނީ، އުފަލާއި ހިތްހަމަޖެހުމާއި، އެކަކު އަނެކަކަށް ކުރާ އިހްތިރާމާއި ގަދަރާއި ލޯބީގެ އަމާންކަމުގައި އެވެ.
އަހަރުމެންގެ 'އަމިއްލަ ވަގުތުކޮޅަށް' ނިމުން އައީ ބީނިޝް އާއި ބޭބެގެ ހަނގުރާމައިގެ އަޑަށެވެ.
"ފަހަދު މޮޔަކޮށްނުލައިފިއްޔާ ރަގަޅު.. މި ދެ މީހުންގެ ހަނގުރާމައަކީ އަހަރެންގެ ރެއާއި ދުވާލުގެ އެންމެ ހިތްގައިމު މުނިފޫހިފިލުވުން" ހިނިއައިސްފައި މާލިކް ބުންޏެވެ.
"ބީނިޝް ދޯދދދ.." އަހަރެން އުޅުނީ ބީނިޝް ހުއްޓުވަން ދާށެވެ. އެކަމަކު އަހަރެންގެ އަތުގައި ހިފާފައި ހުއްޓުވީ މާލިކް އެވެ.
"ބީނިޝް ހުއްޓުވާނެ ކަމެއް ނެތް.. އެއީ ހުއްޓުވާ ވަރަށްވުރެން މާ އުފާވެރި ވަގުތުކޮޅެއް" މާލިކް ބުންޏެވެ.
ނުހަނު ލޯބިން، ފަރުވާތެރިކަމާއެކު އަހަރެންގެ އަތުގެ އިނގިލިތަކުގައި ވަކިވަކިން މާލިކް ފިރުމާލި އެވެ. އޭނާ އަޅުވާފައިވާ އަގުބޮޑު އަނގޮއްޓީގައި ފިރުމާލަމުން ލުއި ހިނިތުންވުމެއް ރައްދުކޮށްލި އެވެ.
"ކައިރާ ގާތުގައި ކޮންމެހެން ބުނަންޖެހޭ ވާހަކައެއް އެބަ އޮތް" އަހަރެންގެ ލޮލަށް ބަލަމުން މާލިކް ބުންޏެވެ. ފެނުނީ ސީރިއަށް މޫނެކެވެ. އަހަރެންގެ ލޮލުން އިޝާރާތްކޮށް، ވާހަކަ ކުރިއަށް ގެންދަން ބުނީމެވެ.
"އަހަރުތަކެއް ކުރީން އަހަރެންގެ މަންމަ މި ދުނިޔެއާއި އަލްވަދާއު ކިޔައިފި.. މަންމަ ނިޔާވެ، މާ ގިނަ ދުވަސްތަކެއް ނުވަނީސް ބައްޕަ އެހެން ކައިވެންޏެއް ކުރި.. އެ ކައިވެންޏަށް ބައްޕަގެ އެހެން ކުއްޖަކު ހުންނާނެ! އެއީ އަންހެން ކުއްޖެއް.. މާނައަކީ އަހަރެންގެ 'ސްޓްޕް ސިސްޓަރ'އެއް ހުރޭ.. އެމީހުންގެ ތެރެއިން އެއްވެސް މީހަކާއި އަހަންނާއި މާބޮޑު ގުޅުމެއް ނޯންނާނެ.. ގުޅުން ބާއްވާކަށް އެމީހުންވެސް، މިހާރަކު މަސައްކަތެއް ނުކުރޭ.. އެމީހުން ބޭނުންވަނީ އަހަންނެއް ނޫން.. އަހަރެންގެ ފަރާތުން ލިބެން އޮންނަ ފައިދާއަކާއި އަހަރެންގެ ފައިސާއާއި މުދާ... އެކަމުގެ ދޮރުތައް އަހަރެން ބަންދުކުރި ހިސާބުން މި ގުޅުން އޮތީ މުޅިން ކެނޑިފައި.. އަހަރެންނާއި ބެހޭގޮތުން މިއަށްވުރެން އިތުރަށް އެނގެންޖެހޭ މައުލޫމަތެއް ދެން ނުހުންނާނެ.. ކައިރާ ބޭނުންކޮންމެ ސުވާލެއް ކޮންމެ ވަގުތަކުވެސް ކުރުމުގެ ހުއްދަ އަބަދުވެސް އޮންނާނެ" ޖުމުލަތައް ނިންމާލާފައި މާލިކް ހަށި ފުރައި ނޭވާއެއް ލިއެވެ.
އަހަރެން ހިނިތުންވީމެވެ.
"އެހެންތަ؟ އެހެން ވިއްޔާ، މިހާރު މި ކައިވެންޏަށް އަހަރުމެން ދެމީހުންވެސް ތައްޔާރު!" ހަމަޖެހިލާފައި އަހަރެން ބުނީމެވެ.
"އިތުރު އެއްވެސް ސުވާލެއް ކުރާކަށް ކައިރާ ބޭނުމެއް ނޫން؟" މާލިކް ސުވާލުކުރި އެވެ.
"ބޭނުމެއް ނޫން.. ކުރާނެ ސުވާލެއްވެސް ނެތް.. މާލިކް ތި ބުނީނުން، އެމީހުންނާއި މާލިކްއާއި އެއްވެސް ގުޅުމެއް ނޯވެޔޭ.. އެހެންވީމަ އޭގައި މައްސަލައެއް ނެތެއްނުން.. އެމީހުންނާއި އަހަރެންވެސް މާ ބޮޑު ގުޅުމެއް ބޭއްވުން މާލިކްއަށް ކަމުދާނެކަމަކަށް ގަބޫލެއް ނުކުރެވޭ.." ހީވާއެއްޗެއް އަހަރެން ބުނީމެވެ.
"ނޫން.. ތިޔަކަހަލަ އެއްވެސް މަނާކުރުމެއް ނޯންނާނެ.. ކައިރާ ބޭނުމިއްޔާ އެމީހުންނާއި ގުޅުން ބަދަހިކުރަންވީ.. އަހަރެންގެ ފަރާތުން މިހައިތަނަށް އެމީހުން ހަމައެކަނި ބޭނުންވެފައި އޮތީ ފައިސާ އާއި ފައިދާ.. އެކަމަކު ކައިރާ ބޭނުން ކޮންމެ ހައްދެއްގެ ތެރޭގައި އާއިލީ ގުޅުން ބިނާކުރުމަށް ހުރަހެއް ނެތް" މާލިކް ބުންޏެވެ.
"ހޫމްމމމ.. އެހެންވީމަ، ކުރިއަށް އޮތް ތަނުގައި ތަފާތެއް ފެނޭތޯ ބަލާލާނީ.." ތަންކޮޅެއް ދުރަށް ވިސްނާލާފައި އަހަރެން ބުނީމެވެ.
"ތިޔަށްވުރެން ފުރިހަމަ އަނބެއް މި ދުނިޔޭގައި އަތް ފުނާއެޅިޔަސް އަހަންނަށް ނުލިބޭނެ!"
"ވަރަށް ލޯބިވޭ"
"މާބޮޑަށް ލޯބިވޭ"
އަހަރުމެން އެންމެން އެކުގައި މާލިކްގެ ކާރުގައި ފެމިލީ ކޯޓަށް ދަތުރު ފެށީމެވެ. މާޒީ ފަސްދީފި އެވެ.
މި ކައިވެނީގައި ބަރަކާތް ލެއްވުން އެދި ހިތުގެ އެންމެ ފުނުން ﷲތައާލާއަށް ދުއާ ދެންނެވީމެވެ. (ނުނިމޭ)
