އެމްޑީޕީގެ ކޮންގެރެސް ފައްޓަވާދެއްވާ ވާހަކަ ދައްކަވަމުން ނަޝީދު ވިދާޅުވީ މި ސަރުކާރުގައި ރާއްޖޭގެ އިގްތިސާދީ ކަންކަން ގެންދާނެ މީޒާނެއް މިސްރާބެއްވެސް ނެތްކަމަށެވެ. އަދި ސަރުކާރުން ގެންގުޅޭ އިގްތިސާދީ ސިޔާސަތަކުގެ ސަބަބުން ނޭނގި ތިބެ ރާއްޖެ އަނދަވަޅަކަށް ވެއްޓެމުން ދާކަމަށް ނަޝީދު ވިދާޅުވި އެވެ.
ހަނގުރާމައިގެ އޮއިވަރެއް ދުނިޔެ އޮތް އިރު އަދި އެ ހަނގުރާމަ ރާއްޖެއާއި ހަމައަށް އަންނައިރު ބައިނަލް އަގްވާމީ ގުޅުންތައް ބާއްވަން ވީ ގޮތްވެސް މި ސަރުކާރަށް ނޭނގޭކަމަށްވެސް ނަޝީދު ވިދާޅުވި އެވެ. އެގޮތުން އެދުވަހު ދައްކާ ވާހަކަ އަނެސއް ދުވަހު މި ސަރުކާރުން ދައްކަނީ މުޅިން އެހެން ގޮތަކަށްކަމަށްވެސް ނަޝީދު ވިދާޅުވި އެވެ.
ނަޝީދު ވިދާޅުވީ މި ސަރުކާރަށް އެއްގޮތަކަށްވެސް މި ދުނިޔޭ ހިނގާ މަގާއި ހިނގާ ގޮތްވެސް ނޭނގޭކަމަށެވެ. އެހެންކަމުން މި ބޭފުޅުންގެ އަތްމަތީ އަޅުގަނޑުމެންގެ ރާއްޖެ ބާއްވަން ހެޔޮ ނުވާނެކަމަށްވެސް ނަޝީދު ވިދާޅުވި އެވެ. ގައުމުގެ މިނިވަންކަން ގެއްލިގެން ދަނީ ވެރިކަން ކުރަން ނޭގޭ ގަމާރު ބަޔަކު ވެރިކަން ކުރުމުން އަންނާތީކަމަށްވެސް ނަޝީދު ވިދާޅުވި އެވެ.
ނަޝީދު ވިދާޅުވީ މި ސަރުކާރުގެ ހަމައެކަނި އަމާޒަކީ ދޮގު ހެދުމާއި އޮޅުވާލުމާއި މަކަރު ހެދުންކަމަށެވެ. އަދި ރާއްޖޭގެ ރައްޔިތުންކަމެެއް ކޮށްދިނުމުގެ ކުޑަ ހިޔާލެއްވެސް މި ސަރުކާރުގައި ނެތްކަމަށްވެސް ނަޝީދު ވިދާޅުވި އެވެ. ނަޝީދު ވިދާޅުވީ އެމްޑީޕީން މި ވެރިކަން ބަދަލުކުރާނެކަމަށާއި ދެން ރާއްޖޭގައި ވެރިކަން ކުރާނީ އެމްޑީޕީން ކަމަށެވެ.
