މިއަދު ފާހަގަކުރާ ޤައުމީ ބްރޯޑްކާސްޓިން ދުވަހުހެ މުނާސަބަތުގައި ކޮމިޝަނުން ނެރުނު ބަޔާނެއްގައި ބުނީ ބްރޯޑްކާސްޓިންގެ ހިދުމަތަކީ ގައުމެއްގެ އިޖުތިމާއީ، ސިޔާސީ އަދި އިގްތިސާދީ ހޭލުންތެރިކަން އިތުރުކުރުމުގައްޔާއި، ރައްޔިތުންނަށް ތެދު މައުލޫމާތު ފޯރުކޮށްދިނުމުގައި އެންމެ މުހިންމު އެއް ވަސީލަތްކަމަށެވެ. ހާއްސަކޮށް، އިސްލާމީ ރިވެތި އަހްލާޤާއި ދިވެހި ޤައުމިއްޔަތާއި ސަގާފަތް ދަމަހައްޓައި، ސައްހަ އަދި އިތުބާރުހުރި މައުލޫމާތު މުޖުތަމަޢަށް ފޯރުކޮށްދިނުމުގައި ބްރޯޑްކާސްޓަރުން 29 ޑިސެމްބަރު 1962 ގައި "މާލެ ރޭޑިއޯ" ގެ ނަމުގައި ފެށިގެން އަދާކުރައްވަމުން ގެންދަވަނީ ނުހަނު އަގުހުރި ޤައުމީ ހިދުމަތެއްކަމަށެވެ.
ރާއްޖޭގެ ބްރޯޑްކާސްޓިން ތާރީހަށް ބަލާއިރު، ސެނެކޯ ރޭޑިއޯއާއި، 1967 ގައި މޯލްޑިވްސް އައިލެންޑް ބްރޯޑްކާސްޓިން ސާވިސް (އެމްއައިބީއެސް) އަދި 1969 ގައި ރޭޑިއޯ މޯލްޑިވްސްގެ ނަމަށް ބަދަލުވެ، 1980 ގައި "ދިވެހިރާއްޖޭގެ އަޑު" ގެ ނަމުގައި ހިދުމަތް ފުޅާވެގެންދިޔައެވެ. އަދި 1978 ގައި ޓެލެވިޒަން މޯލްޑިވްސް (ޓީވީއެމް) އުފެދިފައިވާއިރު، 2007 ގައި އަމިއްލަ ފަރާތްތަކަށް ބްރޯޑްކާސްޓްކުރުމުގެ ފުރުސަތު ހުޅުވައިލެވުނެވެ.
މި ތާރީހީ އޮއިވަރުގެ ތެރެއިން 2010 ވަނަ އަހަރު އަމަލުކުރަން ފެށި ބްރޯޑްކާސްޓްކުރުމުގެ ގާނޫނުއާއެކު ބްރޯޑްކާސްޓަރުންނަށް ހާއްސަ ގާނޫނީ އޮނިގަނޑެއް ގާއިމުވެގެންދިޔަ އެވެ. އަދި 18 ސެޕްޓެމްބަރު 2025 ގައި ތަޞްދީޤުކުރެވުނު މީޑިއާ އަދި ބްރޯޑްކާސްޓިންގ ރެގިއުލޭޝަން ޤާނޫނު ގެ ދަށުން މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަން (އެމްއެމްބީސީ) އުފެދި، ބްރޯޑްކާސްޓިން ދާއިރާ ވަނީ ޒަމާނީ މީޑިއާތައް އެކުވެ އައު ދައުރަކަށް ވަދެފައެވެ.
ދިވެހިރާއްޖޭގެ ބްރޯޑްކާސްޓިން ދުވަސް ފާހަގަކުރާއިރު މިއަދާ ހިސާބަށް ދިވެހިރާއްޖޭގައި 37 ބްރޯޑްކާސްޓަރުން އަދި 29 ރީބްރޯޑްކާސްޓަރުން ހިދުމަތް ދެމުން ގެންދާކަމަށް މީޑިއާ ކޮމިޝަނުން ބުނެ އެވެ.
ޓެކްނޮލޮޖީގެ ގޮތުންނާއި މީޑިއާގެ ދާއިރާއަށް އަންނަމުންދާ ބަދަލުތަކާއެކު، ބްރޯޑްކާސްޓިން ދާއިރާ ކުރިއަރުވައި، ޒަމާނީ ވަސީލަތްތަކާއެކު ފެންވަރު ރަނގަޅު ހިދުމަތްތަކެއް ރައްޔިތުންނަށް ފޯރުކޮށްދިނުމަށް މި ކޮމިޝަނުން އަބަދުވެސް މަސައްކަތް ކުރަމުން ގެންދާނެ ކަމުގެ ޔަޤީންކަންދޭކަމަށް މީޑިއާ ކޮމިޝަނުން ބުނެ އެވެ. އެގޮތުން ދާއިރާގެ މަސައްކަތްތެރިންގެ ފަންނީ ތަމްރީނުތަކާއި ގާބިލުކަން އިތުރުކުރުމާއެކު ޤާނޫނާއި ގަވާއިދުތަކުގެ އިމުގެ ތެރެއިން، މިނިވަން އަދި ޒިންމާދާރު ނޫސްވެރިކަމަކާއި ބްރޯޑްކާސްޓިން ވެއްޓެއް ޤާއިމުކުރުމަށް ބާރުއެޅުމަކީ މައިގަނޑު އެއް އަމާޒުކަމަށްވެސް އެ ކޮމިޝަނުން ބުނެ އެވެ.
ބްރޯޑްކާސްޓިން ދާއިރާ ތަރައްޤީކޮށް، ދާއިރާގެ މަސައްކަތްތެރިންގެ ހައްގުތައް ރައްކާތެރިކުރުމަށް މި ކޮމިޝަނުން ކުރަމުންދާ މަސައްކަތްތައް ހުއްޓުމެއްނެތި ކުރިއަށްދާނެ ކަމުގެ ޔަޤީންކަން ދޭކަމަށްވެސް ކޮމިޝަނުން ވަނީ ބުނެފަ އެވެ.
