މި އިންޒާރު ލިބިފައިވަނީ ހުކުރު ދުވަހު ފޮނުވި އީމެއިލެއް މެދުވެރިކޮށެވެ.
ފުލުހުން ބުނީ އަމީތާބް ދިރިއުޅޭ "ޖަލްސާ" ގެއަށް ބޮމުގެ އިންޒާރު ދިނުމުގެ އިތުރުން، ބޮމްބޭ ހައިކޯޓާއި މަހާލަކްޝްމީ ރޭސްކޯސް ގޮއްވާލާނެ ކަމުގެ އިންޒާރު ވެސް އެ އީމެއިލްގައި ދީފައިވާ ކަމަށެވެ. އެއާ އެކު ފުލުހުން ވަނީ ވަގުތުން އެ ސަރަހައްދުތަކުގެ ސެކިއުރިޓީ ވަރުގަދަކޮށް ބަލައިފާސްކުރަން ފަށައިފައެވެ.
މި އިންޒާރާ ގުޅިގެން ފުލުހުންގެ ހާއްސަ ޓީމުތަކުން ވަނީ ޖުހޫގައި ހުންނަ އަމީތާބްގެ ގެއާއި، އީމެއިލްގައި ފާހަގަކޮށްފައިވާ އެހެން ތަންތަން ފުރިހަމައަށް ބަލައި ޗެކްކޮށްފައެވެ. ނަމަވެސް އެ ސަރަހައްދުތަކުން އެއްވެސް ޝައްކުކުރެވޭ އެއްޗެއް ފެނިފައިނުވާ ކަމަށް ރަސްމީ ފަރާތްތަކުން ވަނީ ކަށަވަރުކޮށްދީފައެވެ.
ފުލުހުންގެ އޮފިޝަލަކު ވިދާޅުވީ، ރައްޔިތުންނާއި އިސް ފަރާތްތަކުގެ ރައްކާތެރިކަން ކަށަވަރު ކުރުމަށްޓަކައި އަޅަންޖެހޭ ހުރިހާ ސަލާމަތީ ފިޔަވަޅުތަކެއް ވަގުތުން އަޅާފައިވާ ކަމަށާއި، މިހާރު ހާލަތު އޮތީ ފުރިހަމަ ކޮންޓްރޯލްގެ ދަށުގައި ކަމަށެވެ.
މި އިންޒާރަކީ ހަގީގީ ނުރައްކަލެއް އޮވެގެން ދިން އިންޒާރެއްތޯ ނުވަތަ މީހަކު ގަސްދުގައި ބިރުދައްކަން ކުރި ކަމެއްތޯ ބެލުމަށް ފުލުހުން މިހާރު ވަނީ ތަހުގީގެއް ފަށައިފައެވެ. އަދި އެ އީމެއިލް ފޮނުވި މީހާ ހޯދުމުގެ މަސައްކަތް ވެސް ފުލުހުން ދަނީ ކުރަމުންނެވެ.
