މޫސާ އަލީ މިއަދު އަވަހާރަވުމާއި ގުޅިގެން ދިވެހިބަހާ ސަގާފަތާ ތަރިކައާ ބެހޭ ކުރީގެ މިނިސްޓަރު އަދި ބަހަށް ހިދުމަތްކުރައްވަމުން ގެންދަވާ އާދަމް ނަސީރު އިބްރާހީމް 'ފޭސްބުކް'ގައި ލިޔުއްވި ޕޯސްޓެއްގައިވަނީ މޫސާ އަލީއަކީ ދަރިވަރުންނަށް ނަމޫނާ ދެއްކެވި މުދައްރިސެއް ކަމަށެވެ.
އުމުރުފުޅުން އެންމެ 16 އަހަރުގައި ދައުލަތުގެ ވަޒީފާއަށް 17 ޖޫން 1958ގައި ވަދެވަޑައިގެންނެވި މޫސާ ޢަލީ ވަނީ ހަމީދިއްޔާ މޮންޓިސޫރީ ސްކޫލު (މިހާރުގެ އިސްކަންދަރު ސްކޫލު)ގައި މަސައްކަތްކުރައްވައި، އަވަށްޓެރި ސްރީލަންކާގައި ތިބި ދިވެހި ކުދިންނަށް ކިޔަވައިދެއްވުމުގައި ވެސް އަށް އަހަރު ހޭދަކުރައްވައިފަ އެވެ.
މޫސާ އަލީއަށް ވަނީ މިނިވަން 25 ގެ އިނާމާއި ދިވެހި ބަހަށް ހިދުމަތް ކުރެއްވުމުގެ ރޮނގުން އާންމު ހިދުމަތުގެ ހިތްވަރު ދިނުމުގެ އިނާމު ވެސް ލިބިވަޑައިގެންފަ އެވެ. އޭނާއަށް އެންމެ ފަހުން 2023 ގައި ލިބިވަޑައިގަތީ ދިވެހި ދައުލަތަށް ހިދުމަތް ކުރެއްވުމުގެ އިނާމެވެ.
