މި މައްސަލައަކީ އިސްލާމިކް ބޭންކުގެ ފެސިލިޓީއެއްގެ ދަށުން ނަގާފައިވާ 25،112 ރުފިޔާގެ އައިފޯން 16 ޕްރޯ މެކްސް ފޯނެއް، މަކަރާއި ހީލަތުން އަތުލައި ގުޅުން ކަނޑާލި ކަމަށް ބުނެ އެ ފޯނާއި ވަކީލު ފީގެ ގޮތުގައި 10،000 ރުފިޔާ ހޯދަން އެދި ފިރިހެން މީހާ ހުށަހެޅި މައްސަލައެކެވެ.
ނަމަވެސް އަންހެން މީހާގެ ފަރާތުން ބުނެފައިވަނީ އެ ފޯނަކީ އެއްވެސް ޝަރުތަކާ ނުލައި، އުފަންދުވަހުގެ ހަދިޔާއެއްގެ ގޮތުގައި އޭނާއަށް ދީފައިވާ އެއްޗެއް ކަމަށެވެ.
މައްސަލަ ނިންމައި ކޯޓުން ކުރި ހުކުމުގައި ބަޔާންކޮށްފައިވަނީ، ދެމީހުންގެ ދެމެދުގައި އޮތް ގުޅުމެއްގެ ތެރެއިން އެއްވެސް ޝަރުތަކާ ނުލައި ދޭ ހަދިޔާއެއް، ފަހުން ގުޅުން ކެނޑުމަކުން އަނބުރާ ހޯދުމުގެ އެއްވެސް ޝަރުއީ އަދި ގާނޫނީ ހަމައެއް ނޯންނާނެ ކަމަށެވެ.
އެހެންކަމުން އެ ދައުވާ ސާބިތުނުވާ ކަމަށް ނިންމައި، މައްސަލަ ކާމިޔާބުކުރި އަންހެން މީހާގެ ވަކީލު ފީގެ ގޮތުގައި 5،000 ރުފިޔާ ކުރިއަށް އޮތް ތިން މަސްދުވަހުގެ ތެރޭގައި ދެއްކުމަށް ދައުވާކުރި ފިރިހެން މީހާގެ މައްޗަށް ކޯޓުން ވަނީ އަމުރުކޮށްފައެވެ.
