އިއްޔެ ރައްޔިތުން މަޖިލީހުގެ ބަޖެޓް ކޮމެޓީގައި ވާހަކަ ދައްކަވަމުން ގަވަރުނަރު މުނައްވަރު ވިދާޅުވީ ދައުލަތުގެ ޓެކްސް އިދާރާ މީރާއިން އިސްކަންދެނީ ހަމައެކަނި ކުދި ކަންމަތީ ފިހާރަތައް އެކަނި އޮޑިޓްކުރަންކަމަށެވެ. އެހެންނަމަވެސް މީރާއިން އޮޑިޓްކުރަންވީ ރިސޯޓްތަކަމަށްވެސް ވަނީ ވިދާޅުވެފައެވެ.
ދައުލަތުގެ ޓެކްސް އިދާރާ މީރާއިން މަރުކަޒީ ބޭންކުގެ ގަވަރުނަރަށް ފާޅުގައި ފުރަތަމަ ފަހަރަށް ރައްދުދީ ނެރުނު ބަޔާނެއްގައި ބުނީ ކްސް ނެގުމާބެހޭ އިދާރީ ގާނޫނުގެ ދަށުން މީރާއާ މަތިކޮށްފައިވާ މައިގަނޑު ޒިންމާއަކީ ޓެކްސްއާބެހޭ ސިޔާސަތުތައް ހިންގުމާއި ޤާނޫނީ ގޮތުން ދައުލަތަށް ނަގާ އެންމެހައި ޓެކްސް ނެގުމުގެ މަސައްކަތް ހިންގައި ބެލެހެއްޓުން ކަމަށެވެ.
މިގޮތުން ޓެކްސް ދައްކާ ފަރާތްތަކުން ޓެކްސް ހިސާބުކުރަމުން ދަނީ ޓެކުހުގެ ގާނޫނުތަކާ އެއްގޮތަށްތޯ ބެލުމާއި، ޓެކްސް ޤާނޫނާއި އެއްގޮތަށް ޓެކްސް ދައްކާ ފަރާތްތަކުން ޓެކުހުގެ ޒިންމާއަދާކުރާކަން ކަށަވަރުކުރުމަކީ މިރާ އިން އަދާކުރަމުންދާ ޤާނޫނީ ޒިންމާއެއްކަމަށް މީރާއިން ނެރުނު ބަޔާނުގައި ވެއެވެ. އަދި އެކަމުގައި ތަފާތުކުރުން ނުގެންގުޅޭކަމަށް މީރާގެ ބަޔާނުގައިވެއެވެ.
މިރާއިން އޮޑިޓްކުރަން ކަނޑައަޅާ ފަރާތްތަކަކީ "ރިސްކް ބޭސްޑް" އުސޫލުގެ މައްޗަށް އިންތިޒާމު ކޮށްފައިވާ، ކޮމްޕްލަޔަންސް ރިސްކް މެނޭޒްމަންޓް އޮނިގަނޑެއްގެ ތެރެއިން ހަމަހަމަ އުސޫލުތަކަކުން އޮޑިޓް ކުރުމަށް ހޮވޭ. ފަރާތްތަކެއްކަމަށް މީރާގެ ބަޔާނުގައި ވެއެވެ.
ޓެކްސް ނިޒާމުގެ ތެރެއިން ކުދި ވިޔަފާރިތަކަށް ވަނީ ލުއި އިންތިޒާމުތަކެއް ހަމަޖައްސައިދީފައިކަމަށާއި އެގޮތުން ހިސާބު ބެލެހެއްޓުމާއި، އޮޑިޓް ކުރުމާއި ޓެކްސް ބަޔާން ހުށަހެޅުމުގައި ކުދި ވިޔަފާރިތަކަށް ލުއިތަކެއް ދެވިފައިވާކަން މީރާއިން ވަނީ ފާހަގަކޮށްފަ އެވެ. އަދި މީރާގެ މަސައްކަތްތައް ބައްޓަންކޮށްފައިވަނީ ވިޔަފާރިތަކާ ގުޅިގެން، ވިޔަފާރިތަކަށް ބޭނުންވާާ އެހީތެރިކަން ފޯރުވައިދީގެން. ޓެކްސް. ކޮމްޕްލަޔަންސް އިތުރުކުރުމުގެ މައްޗަށްކަމަށްވެސް މީރާއިން ބުނެ އެވެ. އެހެން ނަމަވެސް ގަސްދުގައި ޓެކްސް ނުދައްކާ ފަރާތްތަކާމެދު ކަނޑައެޅިފައިވާ އުސޫލުތަކުގެ ދަށުން ދަނީ ފިޔަވަޅު އަޅަމުންކަމަށްވެސް މީރާއިން ބުނެ އެވެ.
