އެމްއެންޑީއެފުން މިއަދު ބުނީ މިރޭ ހަނދު ސާބިތުވެއްޖެނަމަ 20:30 އާއި 21:00 އާ ދެމެދުގައި ޖުމްހޫރީ މައިދާނުގައި ބަޑިޖެހުން ކުރިއަށް ދާނެ ކަމަށެވެ.
އެގޮތުން އެންމެ ހާއްސަ ކަމަކީ މިރޭގެ އެ ހަރަކާތުގައި ބަޑި ޖެހުމުގައި އަންހެން ސިފައިން ހަރަކާތްތެރިވުމެވެ.
މި ރޯދައަށް ހަނދު ފެނިގެން ވެސް ބަޑި ޖެހީ އަންހެން ސިފައިންގެ ޓީމެކެވެ.
މިއަހަރުގެ ޝައްވާލު މަހަށް ހަނދު ބެލުން ދުނިޔޭގެ ހުރިހާ އިސްލާމީ ގައުމެއްގައި ވެސް މިރޭ އިރުއޮއްސުމަށް ފަހު އޮންނާނެ އެވެ. އެކަމަކު ފަލަކީ ހިސާބުތަކުން ބަލާއިރު މިއަހަރުގެ ފިތުރު އީދު ދުވަސް ވަނީ އަންނަ އާދިއްތަ ދުވަހަށެވެ.
ހަނދު ފެނިއްޖެނަމަ އަމަލުކުރަން ޖެހޭ ގޮތާއި ގުޅިގެން ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަނުން ނެރުނު އިއުލާނުގައި ބުނެފައި ވަނީ ކޮވިޑް-19 އާ ގުޅިގެން ސަރުކާރު އޮފީސްތައް ބަންދުކުރެވިފައިވީ ނަމަވެސް މިއަހަރު ސައްވާލު މަހުގެ ހަނދު ސާބިތުކުރުމުގެ ކަންކަން އިންތިޒާމުކޮށްފައިވާ ކަމަށެވެ.
ސައްވާލު މަހުގެ ހަނދު ސާބިތުކުރުމަށް ދޭން ޖެހޭ ހެކިބަސް ނެގުމަށް ނިންމާފައި ވަނީ މިއަދު ހަވީރު 18:00 އިން ފެށިގެން އިރުއޮއްސި 19:30 އަށް އެކި ކޯޓުތަކުގަ އެވެ.
