ބަންގްލަދޭޝް މީޑިއާ ރިޕޯޓްތައް ބުނާ ގޮތުން އެ ކޭމްޕް ބާއްވަން އެ ގައުމުން ވިސްނާފައިވަނީ، އީދުގެ ފަހުން، އަދި ކޮވިޑް-19 ގެ ކަންތައް ހަމައަކަށް އެޅުމުންނެވެ.
ބަންގްލަދޭޝްގެ ގައުމީ ފުޓްބޯޅަ ޓީމު އައިސޮލޭޓްކޮށް ކޭމްޕެއް ކުރަން އެ ގައުމުގެ ފެޑެރޭޝަނުން ވިސްނަނީ، ގައުމީ ޓީމުގެ ކުޅުންތެރިން އެކުގައި ރައްކާތެރި މާހައުލެއްގައި ފިޓްކޮށް ބޭތިއްބުމަށެވެ. ގައުމީ ޓީމު އައިސޮލޭޓްކޮށް ބާއްވަން ގަސްދުކުރާ ކޭމްޕު ކުރިއަށް އޮތް މަހެއް ނުވަތަ ދެ މަހެއްހާ ދުވަހުގެ ތެރޭގައި ރޭވޭނެ ކަމަށް އެ ގައުމުގެ ފެޑެރޭޝަނުން އުއްމީދު ކުރެ އެވެ.
ބަންގްލަދޭޝްގެ ފުޓްބޯޅަ ސީޒަން ކޮވިޑާއި ގުޅިގެން ރައްކާތެރިމަގެ ފިޔަވަޅެއްގެ ގޮތުން ކެންސަލްކޮށްފައިވާއިރު، ގައުމީ ޓީމު ވާދަކުރަން ޖެހޭ ވޯލްޑްކަޕް އަދި އޭޝިއަން ކަޕް ޖޮއިންޓް ކޮލިފައިން މެޗުތައްވެސް ވަނީ މުއްދަތެއް ނެތް ގޮތަށް ފަސްކޮށްފަ އެވެ. ވޯލްޑްކަޕް އަދި އޭޝިއަން ކަޕް ޖޮއިންޓް ކޮލިފިކޭޝަންގައި ބަންގްލަދޭޝް ހިމެނިފައިވަނީ ޤަތަރާއި، އޮމާން އަދި އިންޑިޔާ އާއި އަފްޣާނިސްތާނާއި އެކު އެއް ގްރޫޕެއްގަ އެވެ.