އަންނަ މަހުގެ އަށްވަނަ ދުވަހު، ލަލީގާ ފެށުމުގެ ހުއްދަ ސަރުކާރުން ދީފައިވީ ނަމަވެސް، ލީގު އެންމެ އަވަހަށް ފެށުނަސް ފެށޭނެ ކަމަށް ބެލެވެނީ ޖޫން މަހުގެ ބާރަވަނަ ދުވަހުއެވެ. އެހެންނަމަވެސް ލީގުގެ މެޗުތައް ކުރިއަށްދާނީ ރައްކާތެރިކަގެ ފިޔަވަޅެއްގެ ގޮތުން، ސަޕޯޓަރުން ނުވައްދައެވެ. ލަލީގާ އަލުން ފެށުމުގެ ހުއްދަ މި ލިބުނީ، ލީގު ކެންސަލް ކުރަން ޖެހިއްޖެ ނަމަ ބިލިއަން ޑޮލަރުގެ މާލީ ގެއްލުމެއް ވާނެކަމުގެ ކަންބޮޑުވުންތައް އޮއްވައެވެ.

މާރިޗު މަހުން ފެށިގެން މެދު ކަނޑާލާފައިވާ ލަލީގާގެ ކުޅުން އަލުން ފެށުމުގެ ތައްޔާރީތައް މިހާރު ކުރިއަށްދާއިރު، ކްލަބުތަކުން އަންނަނީ ރައްކާތެރިކަމުގެ ފިޔަވަޅުތަކާއި އެކު މިހާރު ޕްރެކްޓިސް ކުރަމުންނެވެ. ލީގު މެދު ކަނޑާލިއިރު ޓޭބަލްގެ އެއްވަނައިގަ އޮތީ ބާސެލޯނާއެވެ. ދެވަނައިގަ އޮތީ ރިއަލް މެޑްރިޑެވެ.