ބަނޑަށް މަރުވި ކުއްޖާގެ ބައްޕަ، ހަސަން ސުޖާއު މިރޭ ސީއެންއެމްއަށް ކިޔައިދިން ގޮތުގައި އަންހެނުން ގޮވައިގެން ޑޮކްޓަރަށް ދައްކަން މިލަންދޫއަށް ދިޔައީ މިއަދު ހެނދުނު 10:00 ހާއިރެވެ.
އެގޮތުން ކުއްޖާ، ވިންދު ނުޖަހާކަން އެނގުމާއެކު ހދ. ކުޅުދުއްފުށީ ރީޖަނަލް ހޮސްޕިޓަލަށް ދިއުމުގެ މަސައްކަތް ކުރި ކަމަށާއި އެ އިންތިޒާމުތައް މެންދުރު 13:00 ހާއިރު ހަމަޖެހުނު ކަމަށެވެ.
ސުޖާއު ކިޔައިދިން ގޮތުގައި އަންހެނުން ވިހަން އޮތީ މިމަހުގެ 30 ވަނަ ދުވަހެވެ. އެކަމަކު ވިހެމުގެ ކުރިން ވެސް ޑޮކްޓަރަށް ދައްކާލުމަށް ފުނަދޫއަށް ދިއުމަށް ވަރަށް މަސައްކަތްކުރި ނަމަވެސް އެކަން ކާމިޔާބުވެފައެއް ނުވެ އެވެ.
އެގޮތުން އޭނާ ވަނީ ފުނަދޫއަށް ދިއުމަށް މަސައްކަތް ކުރާތާ ދޮޅު މަހެއްހާ ދުވަސް ވެއްޖެ ކަމަށް ބުނެފަ އެވެ. އެ ދެ މަފިރިން ގަވައިދުން ދައްކަމުން އައީ ފުނަދޫގައި ހުންނަ އެ އަތޮޅު ހޮސްޕިޓަލަށެވެ.
އެނގިފައިވާ ގޮތުގައި ފުނަދޫ ޑޮކްޓަރު ވަނީ ރަށަށް އަޔަސް ނުބަލާނެ ކަމަށް ބުނެފަ އެވެ. އަދި އެކަން ހޮސްޕިޓަލުގެ މެނޭޖަރަށް އެންގުމުން ކުރެވޭނެ ކަމެއް ނެތް ކަމަށް ވެސް ބުނި ކަމަށް އާއިލާގެ މީހަކު ބުންޏެވެ. އަދި ފުނަދޫގެ ކަމާއި ގުޅޭ އިދާރާތަކުން މީޑިއާއަށް ދޮގު މައުލޫމާތު ދީފައިވާ ކަމަށް ވެސް ތުހުމަތު ކުރެ އެވެ.
އެކަމާއި ގުޅިގެން އަދި ފުނަދޫ ހޮސްޕިޓަލުގެ ބަހެއް ނުލިބެ އެވެ.
