ނޭޝަނަލް އިމަޖަންސީ އޮޕަރޭޝަން ސެންޓަރު އެންއީއޯސީގައި މިއަދު ބޭއްވި ނޫސްވެރިންގެ ބައްދަލުވުމުގައި ހެލްތު މިނިސްޓްރީގެ ޑެޕިއުޓީ ޑިރެކްޓާ ޖެނަރަލް، އައިޝަތު ސާމިޔާ ވިދާޅުވީ ބޭރަށް ނިކުންނައިރު މާސްކް އެޅުން ވަރަށް މުހިއްމު ކަމަށާއި މިއަދު ވެސް ފޮތި މާސްކް އެޅުމާއި ގުޅިގެން މަޝްވަރާތަކެއް ކުރިއަށް ދިޔަ ކަމަށެވެ.
އެގޮތުން ގިނަ ބަޔަކު ފޮތި މާސްކް އަޅަމުން އަންނައިރު ފޮތިން މާސްކް ފެހުމަށް އޮންލައިންކޮށް އޯޑާ ނެގޭނެ އިންތިޒާމުތަކެއް ހަމަޖައްސަވަމުން އަންނަ ކަމަށާއި އަދި އެތަކެތި ރައްޔިތުންނާއި ހަމައަށް ޑެލިވާކުރާ ގޮތަށް ނިންމާފައިވާ ކަމަށެވެ.
މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ޑރ. އިބްރާހީމް އަފްޒަލް ވަނީ މާސްކުގައި ހުންނަން ޖެހޭ މިންގަނޑުތައް ވެސް އާންމުކޮށްފަ އެވެ.
އެގޮތުން ޑރ. އަފްޒަލް ވިދާޅުވީ، މާސްކުގައި މަދުވެގެން ދެ ލޭޔާ ނުވަތަ ތިން ލޭޔާ ހުންނަން ޖެހޭނެ ކަމަށެވެ. އަދި ދެމޭ ފޮތުން ހަދާފައިވާ މާސްކު އެހާ ރަނގަޅު ނޫން ކަމަށް ވިދާޅުވި އެވެ. އަދި އޭގެ އިތުރުން، މާސްކުން ނޭފަތާ އަނގަޔާ ރަނގަޅައް ފޮރުވެންޖެހޭނެ ކަމަށާއި މާސްކު ހުންނަންޖެހޭނީ ބާރުކޮށް މޫނަށް ފިޓުކޮށް ކަމަށް ވަނީ ވިދާޅުވެފަ އެވެ. އަދި ފިޓޫ ކޮށް މާސްކު ހުރި ކަމުގައިވީ ނަމަވެސް މާސްކު އަޅާފަ ހުންނައިރު ފަސޭހައިން ނޭވާލެވެންޖެހޭނެ ކަމަށެ ވެސް ވަނީ ވިދާޅުވެފަ އެވެ.
ކޮވިޑް-19 އާ ގުޅިގެން ސަރުކާރުން ވަނީ ރާއްޖެއަށް އިމްޕޯޓުކުރާ މާސްކާއި ސެނިޓައިޒާ އަދި ސައިބޯންޏާއި ޑިސްއިންފެކްޓު ކުރާ ސާމާނުގެ އިމްޕޯޓު ޑިއުޓީ އާއި ޕްރޮސެސިން ފީ ކަނޑާލާފަ އެވެ.
